Pavlodarda 216 otbasy baspanaly boldy
Jańa turǵyn úıler «Nurly jer» memlekettik baǵdarlamasy aıasynda salynǵan. 1 sharshy metriniń baǵasy - 120 000 teńge. Páterlerdiń aýmaǵy 40-84 sharshy metr aralyǵynda. Baspanaly bolý úshin klıentter Turǵyn úı qurylys jınaq bankindegi shotynda úı qunynyń 20%-na teń bastapqy jarna jınady. Máselen, taza árleýdegi bir bólmeli jáne baǵasy 5 mıllıon teńge bolatyn páterdi satyp alý úshin úmitkerler shotyna 1 mıllıon teńge qarajat saldy. Osydan keıin Turǵyn úı qurylys jınaq banki olarǵa jyldyq mólsherlemesi 5% bolatyn zaem usynyp, baspana ıesi atanýǵa kómektesti.
«Úıli bolǵan turǵyndar páter satyp alý úshin joǵary jalaqy alýdyń mindetti emes ekenin óz isimen kórsetip otyr. Ol úshin turaqty ortasha tabys jáne qarajat jınaý qabileti jetkilikti. Al «Nurly jer» memlekettik baǵdarlamasy men Turǵyn úı qurylys jınaq banki qoldaý kórsetedi. Buǵan osy baǵdarlamanyń aıasynda 2018 jyly baspanaǵa qol jetkizgen 8 000-nan astam qazaqstandyqtyń tájirıbesi dálel. Pavlodardaǵy bul ıgilikti is búgingi sharamen toqtap qalmaıdy. Qosymsha taǵy 650 páter boıynsha turǵyn úı satyp alýshylar pýlyna irikteý jarııalanady», - dep túsindirdi Nurlan Aqshanov.
Pavlodar oblysyndaǵy Turǵyn úı qurylys jınaq banki salymshylary memleketti baǵdarlamadan bólek «Óz úıim» baǵdarlamasy boıynsha da baspana alady. Taza árleýdegi úılerdiń bir sharshy metri - 140 000-165 000 teńge aralyǵynda. Jalpy alǵanda 2019 jyldyń naýryz aıynda eki nysan boıynsha 216 páter paıdalanýǵa beriledi dep josparlanyp otyr.
«Óz úıim» baǵdarlamasyna qatysý arqyly atalǵan páterlerdi Turǵyn úı qurylys jınaq bankiniń kez kelgen klıenti satyp ala alady. Bul - baǵdarlamanyń artyqshylyǵy. Salymshynyń atynda turǵyn úı bolý-bolmaý kerektigi týraly eshqandaı talap qoıylmaıdy.
Qazirgi ýaqytta Pavlodar oblysynyń árbir 13-shi turǵyny, ıaǵnı 55 000 adam Turǵyn úı qurylys jınaq bankinde baspanaly bolamyz dep aqsha jınap jatyr. Jyl basynan beri Pavlodar oblystyq fılıalynyń qyzmetkerleri 2,5 myńnan astam zaem berdi.