Pavlodarda 21 jasar qyz zeınetkerdi tonap ketti

<p>PAVLODAR. KAZINFORM &mdash; Kúdikti zeınetkerdiń páterin bir emes, eki márte tonaǵan. Eń áýeli úıde turǵan aqshasyn jymqyrsa, sońynan taǵy kelip uıaly telefonyn úptep ketken.</p>

Óńirlik polıtsııa departamentinen habarlaǵandaı, tártip saqshylaryna oblys ortalyǵynda turatyn 88 jastaǵy zeınetker shaǵym túsirgen. Keıýananyń aıtýynsha, keshkilik páteriniń qońyraýyn beıtanys qyz bala basyp, ishke engen. Kire sala úı ıesin áńgimemen alańdatyp, servantta turǵan aqshany alyp ketken. Odan qoımaı arada tórt kún ótkende ol ájeıge taǵy kelip, bul joly ashyqtan-ashyq úıden aqsha izdegen. Túk tappaǵan soń qýat kózine qosylyp turǵan «Panasonic» telefonyn qaltasyna basqan.

«Jábirlenýshi ulyna qońyraý shalyp, polıtsııa qyzmetkerlerin shaqyrǵan. Bizdiń jedel qyzmetkerler jyldam iske kirisip, urlyq jasaǵan jandy tapty. Ol 21 jastaǵy qyz bala bolyp shyqty. Zattaı aıǵaqtar qaıtaryldy, al aqshany kúdikti jeke qajetine jaratyp qoıǵan», - dep málimdedi Pavlodar qalasy OPB bastyǵy Jandos Orynbaev.

Qazirgi ýaqytta tonaý faktisi boıynsha sotqa deıingi tergeý júrgizilip jatyr. Kúdikti qamaýǵa alyndy.