Pavlodarda 11 tonnadan astam esirtki órteldi

PAVLODAR. QazAqparat - Pavlodar oblysynyń aýmaǵynda joıylǵan esirtkiniń kólemi - 11 tonna 260 kg-nan asty, quny - 23 mıllıon teńge, dep habarlaıdy QazAqparat.

- Aıta ketý kerek, sot úkimi boıynsha qylmystyq ister boıynsha barlyq zattaı dáleldemeler joıylýǵa tıis. «Kók shóptiń» ózi jáne ony daıyndaýǵa arnalǵan qurylǵylar da, - deıdi Pavlodar oblysy PD Esirtki qylmysyna qarsy is-qımyl basqarmasynyń bastyǵy Málik Ońǵarbaev.

Komıssııa birqatar qylmystyq ister boıynsha qaralyp jatqan esirtkini órtep jiberdi.

Bıyl aýyrlyǵy ártúrli dárejedegi esirtkige baılanysty 22 qylmystyq is tergelip, sotqa joldanǵan.

Zańsyz aınalymnan 24 kg astam esirtki quraly men psıhotroptyq zattar alyndy.

Polıtsııa departamenti esirtkiniń zańsyz aınalymy qylmystyq jaýapkershilikke ákeletinin eskertedi.

Esirtkiniń zańsyz aınalymy faktileri týraly azamattar 8 [phone] nemese 102 senim telefonyna habarlaı alady nemese «Police 102» mobıldi qosymshasyn paıdalanǵan jón.