Pavlodarda 10-nan astam adamdy pátersiz qaldyrǵan alaıaq qolǵa tústi

<p>PAVLODAR. KAZINFORM - Polıtsııa ustalǵan adamnyń 2021-2023 jyldar aralyǵyndaǵy alaıaqtyq oqıǵalarǵa qatysy baryn anyqtap otyr. Ol kóbine halyqtyń osal toptary ókilderin aldap kelgen.</p>

Uıymdasqan qylmysqa qarsy kúres basqarmasynyń qyzmetkerleri Pavlodar oblysynyń aýmaǵynda jyljymaıtyn múlikti zańsyz qaıta resimdeýge baılanysty alaıaqtyq jasady degen kúdikpen azamatty ustady.

«Ustalǵan azamat 2021-2023 jyldar aralyǵynda óz qurbandyǵyn halyqtyń áleýmettik osal toptary arasynan izdep taýyp otyrǵan. Olardy "baspanańdy tıimdi baǵaǵa satyp beremin, mol oljaǵa kenelesiń" dep aldaǵan. Jyljymaıtyn múlikti satqannan keıin kelisilgen somany qaıtarmaı, turǵyndardy pátersiz qaldyrǵan», - dep habarlady Pavlodar oblysy polıtsııa departamenti uıymdasqan qylmysqa qarsy kúres basqarmasynyń bastyǵy Ǵabıt Qabdrahmanov.

Qazirgi ýaqytta iri kólemdegi alaıaqtyq faktisi boıynsha sotqa deıingi tergeý júrgizilýde. Kúdikti qamaýǵa alyndy. Onyń 10-nan astam epızodqa qatysy bary deleldenip otyr.