Pavlodarda 10 kún «tek qazaqsha sóıleımiz» aktsııasyn uıymdastyrý usynyldy
Pavlodar oblysy mádenıet, tilderdi damytý jáne arhıv isi basqarmasy basshysynyń orynbasary Sáýle Osmanova onkúndik sheńberinde oblystyń qalalary men aýdandarynda elimizde turatyn etnos ókilderiniń mádenıetin, tarıhyn jáne turmysyn nasıhattaıtyn 150-den astam is-shara uıymdastyrylatynyn atap ótti.
«Basqarmamyzdyń bastamasymen Qazaqstan halqy tilderiniń HHІ respýblıkalyq festıvali jáne «Rýhanı jańǵyrý» baǵdarlamasyn iske asyrý sheńberinde 26 tamyz ben 5 qyrkúıek aralyǵy oblysymyzda «Tilder onkúndigi» bolyp jarııalandy», - dedi Sáýle Osmanova.
Basqarma basshysy orynbasarynyń aıtýynsha, onkúndiktiń maqsaty - tilderdi damytý, ásirese, jastar arasynda nasıhat júrgizý. «Óńirimizde memlekettik til boıynsha másele bar ekeni bárimizge belgili. Sondaı-aq qazirgi kezde latyn qarpine kóshý úrdisi de júrip jatyr. Osy baǵyttarda jumys jasalady«,-deıdi ol.
«Qazaq tili» qoǵamy oblystyq fılıalynyń tóraǵasy Sotsıal Áıtenov til máselesine qatysty pikirin bildirip, latyn qarpine úıretetin tegin sabaqtar bar ekenin aıtty.
«Búginde qazaq tilin balabaqshada úıretý kerek degen bastama kóterilýde. Balasyn ákelgen ata-ananyń ózderi qazaq tilin bilmeıdi. Tárbıe otbasynda bastalady. Sondyqtan ata-analar ózderi de oılanýy qajet. Oǵan qosa, memlekettik tildi bilmeıtin qyzmetkerler de bar. Olarǵa zań júzinde talap qoıylý kerek. Al, «Qazaq tili» qoǵamynyń qala, aýdandardaǵy bólimderinde latyn qarpi boıynsha tegin sabaq beretin eriktiler bar. Turǵyndar kelip úırenýlerine bolady»,- dedi ol.
Qazaqstan Jazýshylar odaǵynyń múshesi, aqyn, jýrnalıst Sholpan Baıǵalynyń aıtýynsha, tildi damytýdy aldymen memlekettik organdardan bastaý qajettigine basa toqtaldy. «Qazir tildi damytý úshin basqasha jumys jasaý kerek. Balabaqsha, mektepterde tıisti jumystar júrip jatyr. Jaýapty basqarma ákimdik pen organdardy memlekettik tilde sóıletýi qajet. Tipti, til basqarmasynyń ózinde qyzmetkerler ózge tilde sóılep jatsa, halyq qaıda barmaq. Sondyqtan qyzmetkerlerdiń aldynda kúntizbe sııaqty aqparattyq dúnıeler qoıý nemese baıqaý ótkizýge de bolady. Osy onkúndik aıasynda 10 kún «tek qazaqsha sóıleımiz» degen aktsııa uıymdastyrǵan jón»,- dedi Sholpan Baıǵaly.
Aıta keteıik, «Tilder onkúndigi» 6 qyrkúıekte tildi keńinen nasıhattap, halyq sanasyn serpiltýdi jáne ár ulttyń ereksheligi men qundylyǵyn kórsetýdi maqsat etetin «Til – rýhanı jańǵyrý tetigi» kontserttik baǵdarlamasymen qorytyndylanatyn bolady.