«Pavlodar jylý elektr ortalyǵynda apat boldy» - feık

PAVLODAR. QazAqparat – Pavlodar jylý-elektr ortalyǵynda apat bolǵany jónindegi aqparat – jalǵan. Bul týraly Pavlodarnews.kz saıty Qalalyq turǵyn úı ınspektsııasy jáne kommýnaldyq sharýashylyq bólimine silteme jasap málim etti, dep habarlaıdy QazAqparat.

Áleýmettik jelide Pavlodar JEO-da apat bolǵany týraly aqparat taralyp jatyr.
«Bul aqparat jalǵan jáne shyndyqqa sáıkes kelmeıdi. Qalalyq jylý-elektr ortalyǵynda eshqandaı apat oryn alǵan joq jáne olardyń barlyǵy shtattyq rejımde jumys istep jatyr. 26 qyrkúıekten bastap qaladaǵy kópqabatty turǵyn úılerge jylý berile bastady. Búgingi tańda 1265 turǵyn úıdiń 650-i jylýǵa qosyldy, keshe jylý berilgen úılerdiń sany 278 bolǵan, ıaǵnı, jylý berilip jatqan turǵyn úılerdiń sany kún saıyn artyp keledi», - dedi bólimnen.

Málim etilgendeı, qazir qaladaǵy barlyq jylý jelilerin sýmen toltyrý qarqyndy júrip jatyr. Bul birneshe ondaǵan myń tekshe metr sý. Jumystar 6 qazanǵa deıin aıaqtalady dep josparlanǵan. Osyǵan baılanysty keıbir úılerde sýdy jylytý parametrleri tómendeýi múmkin.
Qalany jylýǵa qosý boıynsha barlyq resmı derekter memlekettik organdardyń paraqshalarynda jáne «Pavlodarenergo» AQ resmı saıtynda jarııalanady.