«Pavlodar-Vodokanal» kásiporny kommýnaldyq menshikke qaıtaryla ma
Jergilikti halyq Pavlodar qalasyn aýyzsýmen qamtyp turǵan «Pavlodar-Vodokanal» uıymyn da dál solaı kommýnaldyq menshikke alý kerek dep esepteıdi.
«Pavlodar-Vodokanal» JShS — Pavlodar qalasyn aýyzsýmen jáne tehnıkalyq sýmen qamtamasyz etip otyrǵan monopolıst kásiporyn. Buǵan qosa 345 km káriz júıesine qyzmet kórsetedi. 2000 jyldardyń basynda kommýnaldyq sý júıesi memleket balansynan jeke kásipkerge satylyp ketken. Sońǵy jyldary qala halqy bul sheshimniń durys bolmaǵanyn aıtyp, aýyzsý júıesi men qurylystary memlekettik mańyzǵa ıe nysandar bolýy sebepti kommýnaldyq menshikke qaıtarylýy kerek dep esepteıdi.
Bul rette turǵyndar Ekibastuz qalasyndaǵy oń mysalǵa súıenedi.
Esterińizde bolsa, 2022 jyldyń 27 qarashasynda Ekibastuz JEO-synda apat bolyp, qala turǵyndary qatty aıazda jylýsyz qalǵan bolatyn.
Sol jaǵdaıdan keıin Ekibastuz JEO aktsıonerleri Aleksandr Klebanov pen Sergeı Kan jalpy quny 3,7 mlrd teńge turatyn múlikterdi, ıaǵnı jylý-energııa ortalyǵyn Ekibastuz qalasy ákimdiginiń balansyna ótkizdi.
Pavlodar oblysynyń ákimi Asaıyn Baıhanov «Pavlodar-Vodokanal» JShS-nyń memleket qaraýyna alý týraly usynys qısynǵa kelmeıdi dep esepteıdi.
— Ekibastuz qalasyndaǵy jylý ortalyǵyn qala ákimdigi ustap tura almaıtyny anyq edi. Sebebi ony basqaratyn arnaıy bilikti basshylar, mamandar qala ákimdiginde joq. Sondyqtan qala ákimdigi Ekibastuz JEO-ny «Samuryq-Energoǵa» senimgerlik basqarýǵa berdi. Aktsıonerlik qoǵamdyq stansany «Energy Solution Center» JShS enshiles kompanııasy arqyly basqarady. «Pavlodar-Vodokanal» JShS memlekettik kommýnaldyq balansqa alynǵannyń ózinde ony ákimdik tarapynan basqaratyn adam tabylmaıdy. Sebebi kásibı bilim kerek, — deıdi óńir basshysy.
Eske sala keteıik, bıyl maýsym aıynda «Pavlodar-Vodokanal» mekemesiniń sorǵysy isten shyǵyp, Pavlodar qalasynyń kóp bóligi sýsyz qaldy.
Mekeme fotosy: lifepvl.kz