Pavlodar turǵyny: Ultymyz orys bolǵanymen otbasymyzdaǵy 5 qyz qazaqshaǵa sýdaı

PAVLODAR. QazAqparat – Memlekettik tildi bala kezinen jetik biletin Natalıa Saharova qazaqtyń salt-dástúrin de jaqsy biledi, dep habarlaıdy QazAqparat Pavlodarnews.kz saıtyna silteme jasap.

- Men Baıanaýyl aýdany Birlik aýylynda óstim. Bala kezimnen qazaq tilin bilemin. Otbasymyzda 5 qyz. Barlyǵymyz qazaqsha sóılesemiz. Ultym orys bolsa da óz elimniń tilin, dinin, saltyn qurmetteımin. Qazaq halqy qonaqjaılylyǵymen tanylǵan. Biz de sodan qalys qalmaımyz. Kez kelgen merekede qonaq shaqyryp, et asyp, baýyrsaq pisiremiz. Naýryz kójeni de jyl saıyn daıyndaımyn, - deıdi Natalıa Saharova.

Natalıa Saharova Damır esimdi ulyn tárbıelep otyr. Uly da qazaq tilin meńgerip keledi. Natalıanyń aıtýynsha, qazaq tilin ońaı úırený úshin tildi biletin adamdarmen aralasý kerek.

- Men ózim 7 jasymnan qazaq tilinde sóılep kele jatyrmyn. Mektepti qazaqsha oqyp, bitirdim. Qazaq balalarmen aralasqannyń, jıi sóıleskenniń arqasynda tildi jeńil meńgerdim dep oılaımyn, - dedi Natalıa Saharova.

Natalıanyń mamandyǵy erekshe. Ol KSP Steel kompanııasynda kran mashınısi bolyp jumys jasaıdy. Bul salada qyzmet atqaryp kele jatqanyna 4 jyl bolǵan.
- Óndiriste jumys jasaý bas kezinde qıyn bolǵanmen, keıin mashyqtanyp, úırenip ketesiń. Jumys aýyr emes. Oqyp, úırenip aldym. Bul mamandyqty ápke-sińlilerime aıtqan kezde olar qarsy boldy. Meniń dostarym, synyptastarym áli tań qalady. Kran mashınısi bolyp jumys jasaımyn desem, keıbiri qaljyńdap otyr dep oılaıdy, - deıdi Natalıa Saharova.

Keıipkerimiz jumystyń aq-qarasy bolmaıtynyn aıtady. Bastysy, adal eńbek atqarý. Óndiristik oryndarda názik jandylar atqaratyn jumys kóp. Natalıa óziniń qyzy bolsa, óndiristik orynda jumys jasaýyna qarsy bolmaıtynyn aıtady.