Pavlodar prokýrorlary alıment tólemegenderdi avtokólik júrgizý quqyǵynan aıyryp jatyr

<p>PAVLODAR. KAZINFORM - Pavlodar oblysynda jyl basynan alıment tóleý jónindegi mindetterdi oryndamaǵany úshin 34 boryshker qylmystyq jaýapkershilikke, 260 boryshker ákimshilik jaýapkershilikke tartylǵan.</p>

Prokýrorlardyń pármenimen jyl basynan beri 875 mln teńge somasyna alıment qaryzdary ótelgen. 330 boryshkerge jumyspen qamtý organdarynda esepke turý týraly habarlamalar tabystaldy. 91 adam jumysqa ornalastyrylsa, 38 azamat avtokólik júrgizý quqyǵynan aırylǵan.

- Reıdtik sharalar barysynda boryshkerlerdiń 6 kólik quraly aıyppul turaǵyna qamaldy. Quny 22 mln teńgeden asatyn somada 8 jyljymaıtyn múlik óndirip alýshylarǵa qaryzdardy óteý esebine berildi. Alıment tóleý jónindegi mindetterdi oryndamaǵany úshin 34 boryshker qylmystyq jaýaptylyqqa, 260 boryshker ákimshilik jaýaptylyqqa tartyldy,-dep málimdedi óńirlik prokýratýradan.

QR Qylmystyq kodeksiniń 139-baby boıynsha prokýrorlarmen qylmystyq qýdalaý organdaryna 58 boryshkerge qatysty materıaldar joldanǵan. Atalǵan bap boıynsha 2 jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrý túrindegi jaza kózdelgen.

Eske sala keteıik, prokýrorlar Pavlodar psıhonevrologııa ortalyǵynda balalardy kópten beri uryp-soǵyp kelgenin anyqtady.