Pavlodar polıtsııasy quny 55 mıllıon teńge turatyn veıpterdi tárkiledi

<p>PAVLODAR. KAZINFORM&nbsp;&mdash; Ekibastuzda polıtseıler veıp pen qosymsha suıyqtyqty zańsyz saqtap otyrǵan qoımany anyqtady. Tártip saqshylary 5503 veıp pen 1097 qosymsha suıyqtyq quıatyn qutyny tárkiledi.</p>

Bul týraly Pavlodar oblysy polıtsııa departamentiniń baspasóz qyzmetinen habarlady.

— Ekibastuz qalasyndaǵy ónerkásiptik baza aýmaǵynda ornalasqan úı-jaıda polıtseıler 5503 birlik veıp pen 1097 qosymsha suıyqtyq quıatyn qutyny taýyp alyp, tárkiledi. Zańsyz taýarlardyń bul partııasy satýǵa arnalǵan. Atalǵan ónimniń aınalymyna resmı tyıym salý týraly bile tura, jastar ınternet-dúken arqyly tanymal messendjerler men áleýmettik jelilerdegi arnalardy qoldana otyryp, veıpterdi satqan. Zańsyz elektrondy temeki satty jáne taratty degen kúdikpen polıtsııaǵa eki kúdikti jetkizildi. Temekige jatpaıtyn temeki buıymdarynyń, elektrondyq tutyný júıeleriniń (veıpterdiń), hosh ıistendirgishter men suıyqtyqtardyń aınalymy faktisi boıynsha sotqa deıingi tergeý júrgizilip jatyr, — dedi Ekibastuz qalasy polıtsııa basqarmasy bastyǵynyń mindetin atqarýshy Tólegen Qudaıbergenov.

Sondaı-aq, reıdter barysynda avtokólik toqtatylyp, ony tekserý kezinde ınternet-dúken arqyly tapsyrystar boıynsha jetkizýge arnalǵan elektrondyq temeki (veıp) tabyldy.

Eske sala keteıik, Almatydaǵy saýda úıleriniń birinen 5 myń veıp tárkilendi.