Pavlodar polıtsııasynyń dárethanasynda qyzmettik qujattar nege jatqany tergelýde

NUR-SULTAN. QazAqparat - Pavlodar qalasy polıtsııa basqarmasynyń dárethanasyndaǵy qoqys jáshiginde qyzmettik qujattar jatyr. Bul týraly advokat Nazerke Rızabekova áleýmettik jelidegi paraqshasynda jazdy, dep habarlaıdy QazAqparat tilshisi.

Almatylyq zań salasynyń mamany Pavlodardyń polıtsııa basqarmasynyń dárethana jáshiginen is júrgizý qujattaryn tapqanyn aıtady.

«Birneshe aı buryn Pavlodardaǵy polıtsııa basqarmasynda tergeýde boldym. Dárethanada vedomstvo qyzmetkerleri is júrgizý qujattaryn paıdalanatynyn baıqadym. Bul - jabaıylyq. Jaraıdy, munda dárethana qaǵazyna qatysty problema bar deıik, biraq sotaldy tergeý týraly aqparattyń jarııa bolyp ketkenin qalaı túsinemiz? Dárethana qoǵamdyq oryn sanatyna jatady ǵoı», - deıdi advokat.

Avtor jazbasynda A4 formatty myjylǵan paraqtar salynǵan dárethana jáshiginiń sýretin de jarııalaǵan. Onda azamattardyń tegi, baılanys nómirleri, joǵalǵan kámeletke tolmaǵan balanyń ata-anasynyń derekteri aıqyn kórinedi. Jylý batareıasynda da qujattar jatqany ańǵarylady.

«Pavlodar oblysynyń polıtsııa departamenti men Іshki ister mınıstrliginen osy polıtsııa basqarmasyn dárethana qaǵazymen qamtamasyz etýdi, osy qujattardyń avtorlaryna qatysty qyzmettik tergeý júrgizýdi, sotaldy tergeý derekterin jarııa etkeni úshin tártiptik jaýapkershilikke tartýdy suraımyn», - dep talap qoıady Nazerke Rızabekova.

Jarııalanymǵa qatysty Pavlodar oblysynyń polıtsııa departamenti ókili jazbaǵa jaýap berip, oqıǵa boıynsha tergeý júrip jatqanyn jetkizse, departament basshysy Vasılıı Sklıar osy derek negizinde júrgizilgen qyzmettik tergeýdiń nátıjelerin qosymsha habarlaýǵa ýáde beredi.

Vedomstvo fotoda qupııa qujattar emes, qarapaıym anyqtamalar bar ekenin de atap ótti. Biraq bul jaramsyz qyzmettik qaǵazdardy dárethanaǵa tastaýǵa nemese olardy dárethana qaǵazynyń ornyna paıdalanýǵa sheshim qabyldaǵandardy aqtap ala almaıdy. Barlyq qajetsiz qujat joıylýy kerek.