Pavlodar pedagogıkalyq ýnıversıtetine ǵalym Álkeı Marǵulannyń esimi beriledi
Búgin, mádenıet jáne sport mınıstrliginde ótken otyrysta respýblıkalyq onomastıka komıssııasy tıisti sheshimdi qabyldady, dep habarlaıdy QazAqparat mınıstrliktiń baspasóz qyzmetine silteme jasap.
Atap aıtqanda, komıssııanyń qaraýyna memlekettik organdardan barlyǵy 182 ótinish kelip túsken, onyń ishinde bilim jáne ǵylym mınıstrliginen, Aqmola, Aqtóbe, Batys Qazaqstan, Jambyl, Qostanaı, Pavlodar, Soltústik Qazaqstan jáne Túrkistan oblystarynyń, sondaı–aq Shymkent qalasynyń ákimdikteri bar.
Sonymen qatar komıssııa Pavlodar pedagogıkalyq ýnıversıtetine ǵalym Álkeı Marǵulannyń esimin berý týraly usynysty qoldady.
«Qazirgi ýaqytta onomastıka komıssııasy aýqymdy da mańyzdy jumystar atqaryp jatyr. Ózderińiz biletindeı, buryn jańa oblystardy ataýǵa, Qapshaǵaı ataýyn Qonaev dep ózgertýge jáne t.b. qatysty mańyzdy sheshimder qabyldanǵan bolatyn, munda qaralǵan máseleler jergilikti turǵyndardyń pikirin eskerip, máslıhattardyń sheshimimen qabyldanady», - dep atap ótti Mádenıet jáne sport mınıstri Dáýren Abaev.
Otyrys qorytyndysy boıynsha komıssııa músheleri nysandardy qaıta ataý týraly usynysqa oń qorytyndy berdi. Jaqyn arada komıssııanyń qorytyndysy daıyndalyp, zańnamaǵa sáıkes jumystardy júrgizý úshin ýákiletti memlekettik organdarǵa jiberiledi.