Pavlodar oblysynyń memorgandarynda kompıýterler bir mezgilde sóndiriledi

PAVLODAR. QazAqparat - Pavlodar oblysynda memlekettik organdardyń barlyǵynda qyzmetshilerdiń kompıýterleri avtomatty túrde sóndiriledi. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblysy boıynsha departamentinde ótken baspasóz máslıhatynda aıtyldy, dep habarlaıdy QazAqparat pavlodarnews.kz saıtyna silteme jasap.

Departamenttiń memlekettik qyzmet basqarmasynyń bas mamany Dáýren Sarbasovtyń aıtýynsha, Qazaqstanda 98 726 memlekettik qyzmetshi eńbek etedi.

«Qazir memlekettik qyzmetshilerdiń biliktiligin anyqtaý kezinde psıhometrııalyq quraldar qoldanylady. Eger úmitker jaýaptarynyń shynaıylyǵy 50 paıyzdan tómen bolsa, ol adam ári qaraı áńgimelesýge jiberilmeıdi. Sonymen birge, basqarýshy laýazymdarǵa úmitti kandıdattar mindetti túrde esse jazatyn boldy. Bul úmitkerdiń saýattylyǵy men synı kózqarasyn anyqtaýǵa múmkindik beredi», - deıdi Dáýren Sarbasov.

Atap ótilgendeı, memlekettik organdarda kishkentaı balalary bar qyzmetshiler úshin de ıkemdi jumys kestesi engizilýde.

«Departamentimiz ben bizge qarasty aýmaqtyq bólimshelerde pılottyq rejimde jańa jumys kestesi engizilýde. Jumys ýaqyty tańǵy 8.30-dan keshki 17.30-ǵa deıin jalǵasady. Túski úzilis jarty saǵatqa qysqardy: 13.00-den 14.00-ge deıin. Jumys kestesin buzbaýdyń aldyn alý maqsatynda memlekettik organdarda kompıýterlerdiń avtomatty túrde sóndirilýi qolǵa alyndy. Bul júıe óńirimizdiń barlyq jergilikti atqarýshy organdarynda engizildi», - deıdi Dáýren Sarbasov.

Baspasóz máslıhatynda málim bolǵandaı, Pavlodar oblysynda memlekettik qyzmetshilerdiń tapshylyǵy bar. Máselen, departamenttiń memlekettik qyzmet basqarmasy basshysynyń mindetin atqarýshy Sánııa Hasenovanyń aıtýynsha, oblysta 551 bos oryn bar.

«Olardyń 108 basqarýshy laýazymdarǵa arnalǵan vakansııalar. Bos oryndardyń eń kóbi Pavlodar qalalyq ákimdikke tıesili. Onda 49 adam jetispeıdi. Aýdandyq memlekettik organdarda 154 bos oryn bar. Kóbisi, ıaǵnı 31 vakansııa Ýspen aýdanynda», - deıdi Sánııa Hasenova.

Sánııa Hasenovanyń aıtýynsha, Ýspen aýdanyndaǵy memlekettik qyzmetshilerdiń dıfıtsıti halyq sanynyń azaıýy men jalaqynyń tómendiginen oryn alýda. Aýyldyq ákimdikterdegi jetekshi mamannyń jalaqysy 50-70 myń teńgeniń deńgeıinde.

Spıkerler atap ótkendeı, keıbir oblystyq basqarmalardy ońtaılandyrý protsesi mamyr aıynda aıaqtalady. Onyń barysynda shtattyń sany qysqartylmaıdy.