Pavlodar oblysynyń etnomádenı birlestikterine granttar tabystaldy

PAVLODAR. QazAqparat - Pavlodar oblysynyń ákimi Bolat Baqaýov aımaqtyń etnomádenı birlestikterine granttardy tabystady, dep habarlaıdy QazAqparat aımaq ákimdiginiń resmı saıtyna silteme jasap.

Táýelsizdik kúni qarsańynda Bolat Baqaýov qoǵam belsendilerimen «Dostyq úıinde» ótken «dóńgelek ústelde» kezdesti.

Etno-mádenı birlestikterge barlyǵy 28 grant berildi. Sonymen qatar aımaq basshysy arnaıy marapattardy da tabystady. «Nur-ana álemi» qoǵamdyq birlestiginiń Ekibastuz qalalyq fılıalynyń tóraıymy Rymkesh Slambekova Qazaqstan halqy Assambleıasynyń medalimen, nemis etnomádenı birlestiginiń tóraǵasy - QHA-nyń «Jomart ana» tósbelgisimen, al Qazaqstan halqy Assambleıasynyń oblystyq fılıaly tóraǵasynyń orynbasary Seısembaı Jetpisbaev Assambleıanyń «Birlik» medalimen marapattaldy.

«Qazaqstan halqy Assambleıasynyń XXVI sessııasynda sóılegen sózinde el Prezıdenti damyǵan memleketterdiń jańǵyrtylýy birtutas biregeılik negizinde júzege asyrylatynyn erekshe aıtyp ótti. Biz de osyǵan keldik. Sol sebepti aımaqta «Rýhanı jańǵyrý» baǵdarlamasy men Nursultan Nazarbaevtyń jýyrda shyqqan «Uly dalanyń jeti qyry» maqalasynyń júzege asyrylýyna erekshe kóńil bólinedi», - dedi Bolat Baqaýov.   

Sýretti túsirgen - Valerıı Býgaev