Pavlodar oblysynyń Ertis aýdanynda aýyz sý tarıfi úsh esege azaıady
Ertis aýdanynyń turǵyndary úshin tarıfti sýbsıdııalaýǵa respýblıkalyq bıýdjette 195 mıllıon teńge qarastyrylǵan.
Belovod sý qubyryna qosylǵan turǵyndar úshin tarıfti tómendetý týraly oblystyq ákimdikte ótken energetıka jáne TÚKSh, jolaýshylar kóligi men avtomobıl joldary basqarmalarynyń alqa májilisinde aıtyldy. Qazirgi kezde bir tekshe metr sýdyń quny 300 teńge. Tarıfti respýblıkalyq bıýdjetten sýbsıdııalaý bastalǵan kezde onyń quny úsh esege azaıady.
«Aýyl sharýashylyǵynyń mınıstri tıisti buıryqqa qol qoıdy. Qazir bul másele birinshi vıtse-premerdiń qaraýynda. Respýblıkalyq bıýdjette bul maqsatqa 195 mıllıon teńge qarastyryldy. Barlyq shyǵyndy esepke alǵanda turǵyndar úshin bir tekshe metr sýdyń quny 100 teńgege jýyq bolady», - dedi Ertis aýdanynyń ákimi Aıan Beısekın.
Bıylǵy jyly Pavlodar oblysynyń aýyldyq aımaqtarynda toptyq sý qubyry salynyp, 700 shaqyrym sý jelisi tartyldy. Aımaq basshysy Bolat Baqaýov mediger uıymdardyń sý jelisine qajetti qubyryn áli de bolsa Nur-Sultan men Qaraǵandy qalalarynan satyp alatynyna qynjylys tanytty.
«Aqsýda «qubyr jasaýmen aınalysatyn «DANıER» JShS jumys isteıdi. Bul kásiporyn qubyrlaryn naryqqa shyǵarýǵa ázir me? Eger, daıyn bolsa, olar ónimdi artyǵymen shyǵaryp, merdigerler ózimizde jasalǵan qubyrlardy satyp alýǵa jaǵdaı jasaý kerek», - dedi oblys ákimi.
Sonymen qatar, aımaq basshysy salynǵan jáne qurylysy júrip jatqan sý qubyrlaryna qyzmet kórsetetin tehnıkany qazirgi kezdiń ózinde satyp alý kerektigin eskertti.
«2023 jyly aýyldyq aımaqtardaǵy ortalyqtandyrylǵan sý jelilerin salýdy aıaqtaýǵa tıistimiz. Alaıda, sý qubyrlarynyń qojaıyny bolmasa, olar bes jyldyń ishinde jaramsyz bolyp qalady. Ol úshin bizge ekskavator, dánekerleý apparat, basqa da qural-jabdyq qajet. Osy máseleni sheshý úshin bizdiń qarjy ınstıtýttary arqyly tehnıkany lızıngke alý máselesin sheshý kerek», - dedi Bolat Baqaýov.