Pavlodar oblysynyń aldaǵy úsh jylǵa arnalǵan bıýdjeti bekitildi
Oblys ákimdigi baspasóz qyzmetiniń málimetinshe, 2021 jylǵa arnalǵan oblystyq bıýdjettiń kólemi respýblıkalyq qazynadan beriletin transfertter men kredıtterdi esepke alǵanda (93,2 mlrd teńge) 314,6 mıllıard teńgeni quraıdy, bul osy jyldyń bıýdjetinen 3,6%-ǵa kóp.
- Bıýdjetti úlestirý kezinde áleýmettik salaǵa basymdyq berý úrdisi saqtaldy. Bilim berý, densaýlyq saqtaý júıelerin damytý, buqaralyq sportty nasıhattaý jáne múgedektigi bar adamdardy áleýmettik qoldaý negizgi baǵyttar bolyp qalady,-deıdi ekonomıka jáne bıýdjettik josparlaý basqarmasynyń basshysy Irına Nazarchýk.
Aldaǵy jyly Pavlodarda «Saryarqa» shaǵyn aýdanynda mektep tapsyrylyp, «Dostyq» shaǵyn aýdanynda oqý ornynyń qurylysy bastalady.
Eki mektep jalpy 1 850 oqýshyǵa eseptelgen. Sonymen qatar óńirdegi oqý oryndaryna qosymsha qurylys nysanyn salý jumysy jalǵasady. Úsh jyl ishinde osyndaı 9 korpýs tapsyrý josparlanyp otyr.
Bul sharalar oblys mektepterindegi oqýshy oryndarynyń tapshylyǵyn toǵyz ese azaıtýǵa múmkindik beredi.
Jyl saıyn 17 mektepke kúrdeli jóndeý men jabdyqtaýdy kózdeıtin «Zamanaýı mektep» baǵdarlamasy da toqtatylmaıdy.
- Pavlodar qalasynyń №1 aýrýhanasy negizinde gıbrıdti operatsııa jasaý bólmesin qurý, oblystyq kardıologııalyq ortalyqqa arnalǵan emhana ǵımaratyn salý jáne aýyldaǵy alǵashqy medıtsınalyq kómekti damytý josparlanyp otyr. 2023 jylǵa qaraı medıtsınalyq mekemelerdi 93%-ǵa deıin jabdyqtap, jóndeýdi qajet etetin medıtsınalyq mekemeler úlesin 19% - ǵa deıin azaıtý kózdelip otyr, - dedi Irına Nazarchýk densaýlyq saqtaý júıesin qarjylandyrýǵa qatysty.
Turǵyn úı qurylysyna keletin bolsaq, 2021 jyly Aqsý qalasynda eki, al Ekibastuz ben Pavlodarda úsh kópqabatty turǵyn úı salý josparda bar.
Pavlodar men Ekibastuzda «Jumyspen qamtýdyń jol kartasy» baǵdarlamasy boıynsha taǵy eki kópqabatty úı salynady.
Budan ózge «JQJK» aıasynda 2021 jyly qurylys nemese áleýmettik-ınjenerlik ınfraqurylymdy jóndeýge qatysty 18 joba iske asyrylmaq.
- Kelesi jyly 200 shaqyrymǵa jýyq joldy jóndeý josparlanǵan. Aldaǵy úsh jyl ishinde jaqsy jáne qanaǵattanarlyq jaǵdaıdaǵy joldardyń úlesi 91%-ǵa deıin artady dep otyrmyz. Budan basqa, aýyl turǵyndarynyń sapaly aýyz sýmen 2023 jyldyń sońyna deıin qamtamasyz etemiz, ıaǵnı burynǵy jospardy eki jyl buryn oryndaý mindetin qoıdyq,-dep Pavlodar oblysynyń ákimi Ábilqaıyr Sqaqov depýtattarmen josparlarymen bólisti.
2021 jyly bıýdjetten jalpy 113 jobaǵa qarjy bólinedi. Bıýdjet týraly tolyǵyraq oblystyq máslıhat sessııasynyń beınetranslıatsııasynan bilýge bolady.