Pavlodar oblysyndaǵy aýdanda 6 mektepke tarıhı tulǵalardyń esimi berildi

PAVLODAR. QazAqparat – Pavlodar oblysynyń Ýspen aýdanyndaǵy 6 mektepke Abaı Qunanbaıuly, Ahmet Baıtursynuly, Maǵjan Jumabaev, Muhtar Áýezov, Mánshúk Mámetova esimderi berildi, dep habarlaıdy QazAqparat Pavlodarnews.kz saıtyna silteme jasap.

Bilim berý oryndarynyń ataýlary «Uly dala esimderi» jobasy aıasynda ózgertilgen.

Ýspen aýdany bilim berý bóliminiń basshysy Aınagúl Jırenovanyń aıtýynsha, atalǵan joba aıasynda onomastıka bólimine birneshe ret ótinish túsken. Degenmen qoldaý tappaǵan.
«Sebebi mektepter ákimdikke, bilim berý bólimderine de baǵynysty bolmady. Al 2021 jyly bilim berý bóliminiń qaramaǵyna ótken. 14 mekteptiń ataýyn aýystyrýǵa ótinin usynyldy, nátıjesinde alty mektep boıynsha maquldandy», - deıdi Aınagúl Jırenova.

Atap aıtqanda, № 1 Ýspen jalpy orta bilim berý mektebine qazaqtyń aqyny, ádebıet zertteýshi ǵalym, túrkitanýshy, pýblıtsıst, pedagog Ahmet Baıtursynulynyń, № 2 Ýspen jalpy orta bilim berý mektebine alash qozǵalysynyń qaıratkeri, aqyn, qazaq ádebıetiniń jarqyn juldyzy Maǵjan Jumabaevtyń esimderi berildi.
Sondaı-aq № 3 Ýspen jalpy orta bilim berý mektebi – Abaı atyndaǵy jalpy orta bilim berý mektebi, Galıtsk jalpy orta bilim berý mektebi – jazýshy, qoǵam qaıratkeri, ǵulama ǵalym Muhtar Áýezov atyndaǵy jalpy orta bilim berý mektebi bolyp ózgertildi.
Olgın jalpy orta bilim berý mektebi qaharman qazaq qyzy, Keńes Odaǵynyń Batyry Mánshúk Mámetovanyń esimimen, Lozov jalpy orta bilim berý mektebi áıgili akter, rejısser Sháken Aımanovtyń atymen atalatyn boldy.