Pavlodar oblysynda júkti áıel úıinde bosanyp qaldy

AQSÝ. QazAqparat - Pavlodar oblysynda jedel járdem qyzmetkerleri júkti áıeldi úıinde bosandyrdy, dep habarlaıdy QazAqparat DSM baspasóz qyzmetine silteme jasap.

103 qyzmetine áıeldiń merziminen buryn bosana bastaǵany týraly qońyraý túsken.

Dıspetcher medıtsınalyq alǵashqy kómek týraly egjeı-tegjeıli nusqaý bere otyryp, «qońyraýdy ustap turý» ádisin qoldandy.

Oqıǵa ótken aptanyń sońynda boldy.

Shaqyrtý Aqsý qalasynan 14 shaqyrym jerde ornalasqan Aqsý kentindegi kópqabatty úıden kelip tústi.

103-ke qońyraý shalǵan 31 jastaǵy áıel júktiliktiń 28-shi aptasynda merziminen buryn bosana bastaǵanyn habarlady.

Medıtsınalyq top jolda kele jatqanda jedel járdem dıspetcheri patsıentpen baılanysta boldy.

Ol áıelge kishkentaıdyń ómiri men densaýlyǵyn saqtaý úshin ózin qalaı ustaý kerektigi týraly nusqaý berdi.

Dárigerler shaqyrtýdan keıin 8 mınýttan soń keldi.

Alaıda, úıde bosaný kezinde belgili bir asqynýlar paıda boldy.

Sol jerge gınekolog dáriger mamandyǵy bar jedel járdem kishi stantsııasynyń meńgerýshisi shaqyryldy.

Áriptesterimen birge olar náresteni týǵyzyp aldy jáne barlyq qajetti emsharalardy oryndady.

Keıin anasy da, balasy da Aqsý qalalyq aýrýhanasyna jetkizildi. Qazir olar mamandardyń baqylaýynda.