Pavlodar oblysynda jer úı órtenip, 2 jasar qyz kóz jumdy
Órt búgin, 9 tamyzda Tereńkól aýdanyndaǵy Beregovoe aýylynda tutanǵan.
«Jergilikti ýaqytpen saǵat 10:29-da jeke turǵyn úıdiń órtenip jatqany týraly habar tústi. Oqıǵa ornyna departamentten 8 adam men 2 tehnıka jedel jetti. Turǵyn úıdegi órtten 2019 jylǵy bala birinshi, ekinshi dárejeli termııalyq kúıik alǵany anyqtaldy. Alaıda, kúıik shalǵan balany aýrýhanaǵa jatqyzýdyń qajeti bolmady. Ókinishke oraı, 2021 jyly týǵan qyz bala qaıtys boldy», - dep habarlady departamenttiń baspasóz qyzmeti.
Úı órtengen kezde balalardyń anasy aýlada bolǵan. Kópbalaly otbasynyń anasy segizinshi balasynyń ómirge keler kúnin kútip júr.
Jalyn jergilikti ýaqytpen saǵat 11:45-te oqshaýlandy. Al, saǵat 12:15-te tolyǵymen joıyldy. Qazir tótenshelikter órttiń shyǵý sebebi anyqtap jatyr.
Eske sala ketelik, budan buryn Ekibastuzda avtogaz quıý beketi órtendi, jalynnyń úılerge taraý qaýpi bary habarlanǵan edi. Keıin órtengen gaz quıý beketinde er adamnyń denesi tabyldy. Sondaı-aq, Ekibastuz ákimdigi gaz quıý beketindegi órt pen adam ólimine baılanysty jumys toby qurylǵanyn habarlady.
«Qala ákimdiginiń qaýlysymen 23 janar-jaǵarmaı jáne 11 gaz quıý stantsııasy qyzmetine monıtorıng júrgizý jónindegi jumys toby quryldy. Jumys tobyna Ekibastuz qalasy ákiminiń orynbasary tóraǵalyq etedi. Quramynda qalalyq tótenshe jaǵdaılar basqarmasynyń bastyǵy, jergilik polıtsııa qyzmetiniń bastyǵy, kásipkerlik, jer qatynastary, turǵyn úı ınspektsııasy, sáýlet, memlekettik kirister jáne sanıtarııalyq-epıdemologııalyq baqylaý basqarmalarynyń basshylary bar. Jumys toby búgin mindetin atqarýǵa kiristi», - delingen ákimdik málimdemesinde.