Pavlodar oblysynda jemqorlyqpen isti bolǵandar mektep dırektorlyǵyna taǵaıyndalǵan

NUR-SULTAN. QazAqparat – Pavlodar oblysynda buryn sybaılas jemqorlyq qylmysyn jasaǵan eki mektep dırektory jumystan shyǵaryldy. Bul týraly Sybaılas jemqorlyqqa qarsy is-qımyl agenttiginiń Pavlodar oblysy boıynsha departamenti basshysynyń mindetin atqarýshy Ardaq Balǵojın málim etti, dep habarlaıdy QazAqparat tilshisi.

Ardaq Balǵojın ANTIKOR aqparat alańynda óńirdegi birneshe mekemege jemqorlyq táýekelderi boıynsha júrgizilgen taldaýdyń alǵashqy qorytyndysyn jarııalady.

«Sybaılas jemqorlyq táýekelderi boıynsha taldaý júrgizilgen 12 mekemege qatysty 69 usynym engizildi. Onyń ishinde 59 usynym oryndaldy, qalǵandary oryndaý satysynda. Taldaý nátıjeleri boıynsha 7 laýazymdy tulǵa tártiptik jaýapkershilikke tartyldy. Bilim berý salasyndaǵy taldaý kezinde buryn sybaılas jemqorlyq qylmysyn jasaǵan eki mektep dırektory anyqtaldy. Olar eńbek zańnamasyna sáıkes jumystan shyǵaryldy. Buryn sybaılas jemqorlyq qylmysyna barǵan adamdardyń laýazymdy qyzmetke alynýy zańǵa qaıshy áreket. Sondaı-aq, «Eńbek» baǵdarlamasynyń iske asyrylýy boıynsha da sybaılas jemqorlyq táýekelderi anyqtaldy. Biz materıaldardy jedel bólimshelerimizge berdik. Jalpy halyqpen keri baılanys bar, oń ózgerister sezile bastady», – dedi Ardaq Balǵojın.

Onyń aıtýynsha, departamentte sybaılas jemqorlyqqa qarsy mádenıetti arttyrýǵa jáne sybaılas jemqorlyqqa qarsy monıtorıng júrgizý tásilin ózgertýge baǵyttalǵan birneshe joba jumys isteıdi.