Pavlodar oblysynda jańa sýarmaly egis alqaptary qosylyp jatyr

ASTANA. QazAqparat – Jańadan paıdalanýǵa berilip jatqan sýarmaly egis alqaptary soltústik óńirlerde qamtylyp jatyr. Bul týraly Senattyń jalpy otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Memleket basshysynyń tapsyrmasyn oryndaý aıasynda sýarmaly jerlerdiń kólemin ulǵaıtý jumystary jalǵasyp jatyr. Jalpy, respýblıkadaǵy jer qory sýarmaly alqaptyń kólemin ulǵaıtýǵa múmkindik beredi. Alaıda sý tapshylyǵy tejegish faktor ekenin eskerý qajet. Osyǵan baılanysty Qazaqstan Respýblıkasy Prezıdentiniń saılaýaldy baǵdarlamasyn iske asyrý aıasynda aýyl sharýashylyǵy jerlerin sýarýdyń jalpy alańyn 2,5 mln gektarǵa deıin ulǵaıtý týraly tapsyrma berildi. Bul baǵytta Ekologııa mınıstrligi men jergilikti ákimdiktermen birlese tıisti jospar iske asyrylyp jatyr», - dedi E. Qarashókeev.

Onyń aıtýynsha, 2019-2022 jyldary ınfraqurylym salý, sýarmaly jer ýchaskelerin berý jáne aýyl sharýashylyǵy alqaptaryn sýarmaly jer túrlerine kóshirý esebinen jańadan qosylǵan sýarmaly jerlerdiń alańy jospardaǵy 44 myń gektardyń ornyna 51 myń gektardy qurady. Atalǵan jańa sýarmaly jerler respýblıkanyń soltústik bóliginde, ıaǵnı negizinen Pavlodar oblysynda fermerlerdiń qarajaty esebinen engizilgen.

Budan buryn habarlanǵandaı, bıyl 1,5 mln gektar sýarmaly jer ıgeriledi.

Qazaqstan aýmaǵynda jańbyrlatyp sýaratyn mashınalar shyǵaratyn zaýyttar salynady.