Pavlodar oblysynda Tuńǵysh Prezıdent kúnine oraı 300 shara ótedi
Oblystyq ákimdiktiń apparat keńesinde óńirlik ishki saıasat basqarmasynyń basshysy Ernur Dáýenov jeltoqsan merekelerin «EKSPO-2017» stılinde atap ótý kózdelip otyrǵanyn atap ótti. 24 qarashadan 1 jeltoqsanǵa deıin oblys aýmaǵynda ondaǵan nysan saltanatty túrde ashylady. Tuńǵysh Prezıdent kúni qarsańynda Arnaıy ekonomıkalyq aımaqta alıýmınıı óndirisi boıynsha «Giessenhaus» JShS-ni iske qosý, Pavlodardyń «Saryarqa» shaǵynaýdanynda turǵyn úılerdi paıdalanýǵa berý, Energetıkter kóshesindegi kópqabatty úıdiń páter kiltterin tabystaý jáne Ekibastuzda qyzanaq ósiretin jylyjaıdy ashý josparlanǵan.
Sondaı-aq Sharbaqty aýdanynda qaıta jóndeýden keıin memlekettik tilde bilim beretin 60 oryndyq balabaqsha ashylady. Ýspen aýdanyndaǵy Tavoljan aýylynda - medıtsınalyq pýnkt, Jelezınka aýylynda on páterli jataqhana, Baıanaýylda eki páterli tórt úı halyqtyń ıgiligine beriledi.
Lebıaji aýdanynyń Merǵalym aýylynda - klýb ashylady, al Baıanaýyldyń aýdan ortalyǵynda jóndeýden ótken stadıon qaıta iske qosylady. Baıanaýyl turǵyndaryna Qozy Kórpesh - Baıan sulý jáne Máńgilik el jańa alleıalary da tartý etilmek», - dedi Ernur Dáýenov.
Bul aıtylǵandardan tys, «Rýhanı jańǵyrý» baǵdarlamasy aıasynda jas daryn ıeleri arasynda «Meniń jetistigim - Elimniń jetistigi» oblystyq baıqaýy jáne Kásipkerlik ıdeıalardyń jármeńkesi ótedi.
Ernur Dáýenovtiń aıtýynsha, mereke qurmetine oblystaǵy kásiporyndar men uıymdardyń úzdik qyzmetkerleri syıaqymen marapattalady. Táýelsizdik kúnine oraı Pavlodarda memlekettik qyzmetshilerdiń saltanatty ant qabyldaý rásimi jáne kópten kútken Volonterlar úıiniń ashylý saltanaty bolady. 16 jeltoqsan qarsańynda Baıanaýyl aýdanynyń Maıqaıyń jáne Qashyr aýdanynyń Lvovka aýyldarynda balabaqshalar ashylady, onan soń Ekibastuzda qaıta jóndeýden ótken eki balabaqsha baldyrǵandardy qaıta qabyldaıdy. Budan bólek, Aqsý aýyldyq aımaǵynyń Qyzyljar aýylynda jylyjaı kesheni iske qosylsa, meıram kúnderi Aqsýda, Ekibastuzda, Ertis jáne Maı aýdandarynda turǵyndar qonys toıyn toılaıdy.