Pavlodar oblysynda túnde júrip-turýǵa ruqsat qaǵazy kimderge beriledi

PAVLODAR. QazAqparat – Pavlodar oblysynda saǵat 23.00-den 07.00-ge deıin komendanttyq saǵat belgilendi. Bul ýaqytta qala kóshelerinde kúshtik qurylymdardyń, apattyq qyzmetter men arnaıy ruqsat qaǵazyn alǵan mekemelerdiń kólikteri ǵana júre alady, dep habarlaıdy QazAqparat Ravlodarnews.kz saıtyna silteme jasap.

Pavlodar oblysynyń komendanty qol qoıǵan arnaıy ruqsat qaǵazy tótenshe jaǵdaı rejımi kezeńine qurylǵan shuǵyl áreket etý ortalyǵynda beriledi.

«Ruqsat qujatyn jumystar qalanyń azyq-túlik qaýipsizdigin tikeleı qamtamasyz etýmen baılanysty bolǵan jaǵdaıda, aparý, jetkizý úshin beriledi. Ónimderdi jetkizýmen aınalysatyndardyń barlyǵyna – naýbaıshylarǵa, sút óndirýshilerge arnaıy ruqsat berilip qoıdy», - dedi shuǵyl shtabtan.

Komendanttyq saǵat kezinde qala boıynsha kúshtik qurylymdar, jedel járdem, Tótenshe jaǵdaılar departamenti jáne apattyq qyzmetterdiń kólikterine ǵana júre alady. Shuǵyl shtabtan málim etkendeı, jolaýshy tasymalymen aınalysatyn taksı qyzmetterine ruqsat qaǵazdary berilmeıdi. Olar saǵat 23.00-ge deıin jumystaryn aıaqtaýy qajet.

Aıta keteıik, ruqsat qaǵazy ózimen jeke bas qujattaryn jáne jumys ornynan anyqtamany alyp júrmeýge bolady degendi bildirmeıdi. Polıtseıler men bılik ókilderiniń talaby boıynsha bul qujattar dereý usynylýy tıis. Sondaı-aq ruqsaty bar kólik ishinde otyrǵan jolaýshylar da qujattaryn kórsetýi qajet.