Pavlodar oblysynda «Sakraldy geografııa» jobasyna 75 nysan engizildi

ASTANA. QazAqparat -  Pavlodarda «Nur Otan» partııasy oblystyq fılıalynda «Qasıetti Qazaqstan» ortalyǵynyń ókilderi men jergilikti tarıhshy-ǵalymdar Qazaqstannyń qasıetti jerler tizimine kiretin sakraldy oryndardy talqylady, dep habarlaıdy pavlodarnews.kz . 

Oblystyq mádenıet, arhıvter jáne qujattama basqarmasynyń basshysy Ardaq Raıymbekovtyń sózinshe, bul Pavlodarda ótken Ǵylymı-saraptamalyq keńestiń úshinshi otyrysy.

«Elbasymyzdyń «Rýhanı jańǵyrý» baǵdarlamasy aıasynda qolǵa alynǵan elimizdiń sakraldy geografııasyn anyqtaý boıynsha tıisti jumystar atqarylýda. Zertteý jumystary áli de jalǵasyn tabady. Búgingi kúnge deıin 75 nysan naqty engizildi.  Osy anyqtalǵan 75-ten basqa taǵy 20 oryndy qosymsha belgilep qoıdyq. Onyń qanshasy sol tizimge naqty engiziletini belgisiz. Ol búgingi otyrys barysynda belgili bolady», - deıdi Ardaq Raıymbekov. Ǵalymdardyń sheshimimen anyqtalǵan oryndardyń qatarynda Baıanaýyl aýdanyndaǵy Máshhúr Júsip kesenesi, Sultanmahmut Toraıǵyrov kesenesi, Kempirtas jáne Qońyr áýlıe syndy tarıhı oryndar bar. Al, Sharbaqty aýdanynan Ǵabdýl Ýahıt haziret kesenesi, Ekibastuz qalasynan Isabek Ishan kesenesi sol tizimniń qatarynda tur. Tarıh ǵylymdarynyń kandıdaty Qaırat Battalovtyń sózinshe, respýblıkalyq deńgeıde jasalyp jatqan qasıetti oryndar tizimine bizdiń óńirden bes nysan kirgizilgen. Bul áli de tolyǵýy múmkin. - Qazaqstannyń qasıetti jerlerin anyqtaý maqsatynda oblystyq ishki saıasat basqarmasy, oblystyq mádenıet, arhıvter jáne qujattama basqarmasymen birlese otyryp, aýqymdy jumystar atqarylýda. Biz eń aldymen respýblıkalyq tizimge kiretin oryndardy joldaǵan bolatynbyz. Oǵan bizdiń bes nysan kirgen. Odan keıin oblystyq deńgeıdegi tizimdi qurastyrdyq. Sonymen, Ǵylymı-saraptamalyq keńestiń ekinshi otyrysy barysynda oblystyq deńgeıdegi qasıetti jerlerdiń sanyn 75-ke jetkizdik.  Budan bólek talas týdyrǵan taǵy 20-daı nysan tur. Ony mamandarmen aqyldasa otyryp sheshetin bolamyz, - dedi Qaırat Battalov.