Pavlodar oblysynda ońtústikten qonys aýdarǵan jas mamandar sany artty
- 2019 jyly sáýir aıynda otbasymmen birge kóship keldim. Búginde qabyldaý bóliminde meıirger bolyp jumys isteımin. Ózbekstan elinde dúnıege kelgenmin. Almaty oblystyq aýrýhanasynyń jansaqtaý bóliminde alty jyldaı qyzmet ettim. Alaıda ol jaqta azamattyqty rásimdeý qıynǵa túskennen keıin jeke kásippen aınalystym. Nur Otan partııasynda qabyldaýda bolǵanymda osy baǵdarlama jaıly estip, kóshýge bel býdym, - deıdi Salaýat Seıtbaev.
Mamandyǵy – jalpy tájirıbelik dáriger qonys aýdarǵanyna esh ókinbeıtinin aıtady.
- Bes balam bar. Eń kishisi - úshte, úlkeni - 10 jasta. Jubaıym 500 myń teńge grantqa eki sıyr satyp aldy. Óz sharýashylyǵymyzdy júrgizip otyrmyz. Memleket tarapynan usynylǵan qarjyǵa baspana satyp aldyq. Balalar balabaqshaǵa tegin barady. Mektepte tegin tamaqtanady. Bastapqyda jańa ortaǵa beıimdelýde biraz qıyndyqtar boldy. Biraq ujym qoldaý kórsetti. Qazir jaǵdaıymyz jaqsy.
Budan basqa, Ýspen aýdanyna bir jyldyń ishinde alty jas otbasy qonystanǵan. Olardyń ishinde aıtysker aqyn, dástúrli ánshi Bóken Jigeruly, rejısser Omarǵazy Tileýhan, jýrnalıst Nurbek Keńesbaı, mýzyka mamandary Tabıǵat Qaırat jáne Perızat Qurmanǵalıeva bar. Búginde barlyǵy óner, bilim, aýyl sharýashylyǵy salasynda tabysty eńbek etýde.
Ýspen mádenıet úıiniń ádiskeri Qurmetjan Erbaq 1991 jyly naýryz aıynda Qytaı Halyq Respýblıkasynda Órtekes degen jerde dúnıege kelgen. 2013 jyly Túrkistan oblysynyń Kentaý qalasynda bir jyl daıyndyq kýrsynan ótip, 2014 jyly Qoja Ahmet ıAsaýı atyndaǵy Halyqaralyq qazaq-túrik ýnıversıtetinde akterlik mamandyqqa oqyǵan. 2018 jyly Taldyqorǵan qalasyndaǵy Bıken Rımova atyndaǵy drama teatrda jarty jyl jumys istegen.
- 2019 jyly «Dıplommen aýylǵa» baǵdarlamasy boıynsha Ertis óńirine otbasymmen kóship keldim. Jubaıym joǵary bilimdi qazaq tili men ádebıeti pániniń muǵalimi. Túrkistanda oqyǵan. Ol jaqta jumyspen qamtý qıyn. Mamandar men jan sany kóp. Áıelim mektepte, qosymsha kitaphanada jumys isteıdi. Kelgen kezde otbasy músheleriniń jan basyna 89 myń teńgeden berildi. Bir jylǵa jaldap turýǵa 500 myń teńgeden usyndy. Barlyq qarjyny qosyp, úı satyp aldyq. Budan basqa, 250 myń teńgeden kótermeaqy aldyq. Áli de osy jaqqa qonys aýdarýǵa nıetti jastar bar. Aldaǵy ýaqytta ózge ult ókilderimin birlesip, halyq ánderi men kúılerdi dáripteıtin orkestr qurýdy josparlap otyrmyz, - deıdi Qurmetjan Erbaq.
Jas maman 2019 jyly Baıanaýylda ótken «Qanysh Sátbaevtyń unatyp aıtqan ánderi» atty oblystyq baıqaýda 2-oryndy ıelengen. Aqqýly aýdanynda ótken oblystyq Abaı oqýlarynyń bas júldesin jeńip alsa, Taldyqorǵan qalasynda respýblıkalyq kezeńde 2-oryndy enshiledi.
- Shette júrgen qazaqtar týǵan Otannyń, qazaq eliniń qadirin jaqsy biledi. Sondyqtan Qazaqstandaǵy kez kelgen orta, aýyl-aımaq týǵan jerimizdeı ystyq, - deıdi ol.