Pavlodar oblysynda Naýryz merekesinde 190 kıiz úı tigiledi

PAVLODAR. QazAqparat - Pavlodar oblysynda Naýryz meıramy aıasynda 400-den astam is-shara ótkizý josparlanǵan, dep habarlaıdy QazAqparat Pavlodarnews.kz saıtyna silteme jasap.

Bul týraly Pavlodar oblysynyń mádenıet, tilderdi damytý jáne arhıv isi basqarmasynyń basshysy Samal Begalınovanyń aıtýynsha, óńirdiń qala, aýdandarynda jáne aýyldarynda 20-23 kúnderi Naýryz merekesine arnalǵan sharalar kópshilik is-shara retinde ótedi. Alańdarda kıiz úıler tigilip, mádenı jáne sporttyq is-sharalar uıymdastyrylady. Oblys boıynsha jalpy 190 kıiz úı ornatylatyn bolady.

Sondaı-aq ol kıiz úılerde dastarhan jaıylmaıtynyn atap ótti.
- Kıiz úılerdiń barlyǵy kórmelik úıler bolady. Іshinde tamaq ázirlenbeıdi. Dastarhan jaıylmaıdy. Turǵyndar úılerden tys aýmaqtarda demeýshiler esebinen naýryz kóje men baýyrsaqtardan aýyz tıetin bolady, - dedi basqarma basshysy.

Aıta keter jaıt; 23 naýryz kúni Qaıyrymdy ult kúni dep jarııalanǵan. Bul kúni barlyq sala, barsha ákimdik qaıyrymdylyq sharalaryn ótkizedi.
- Sonymen qatar, oblys turǵyndary úshin «Irbıs» telearnasymen birlesip, «Berekeli mereke» telejobasy daıyndalýda. Bul – teatrlandyrylǵan qoıylym. Jobada otbasylyq qundylyqtar, salt-dástúrler kórsetiledi. Bul joba 22 naýryz kúni saǵat 16:00-de, 23 naýryzda saǵat 11:00-de efırge shyǵady, - deıdi Samal Begalınova.

23 naýryz saǵat 15:00-de «Shańyraq» kontserttik zalynda «Ertis arýy» atty oblystyq sulýlyq baıqaýy ótedi.