Pavlodar oblysynda MÁMS-ten 70 mıllıonnan astam teńge jınaldy
Bul týraly búgin óńirlik kommýnıkatsııalar qyzmetinde ótken brıfıng barysynda «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy Pavlodar oblysy boıynsha fılıalynyń dırektory Nurlan Qasymov aıtty, dep habarlaıdy pavlodarnews.kz .
«Elimiz boıynsha jalpy 1 mıllıard 470 mıllıon teńgedeı jınaldy», - deıdi Nurlan Qasymov. «Memleket esebinen halyqtyń osal toptaryna ǵana tólemder jasalady. Ondaı toptar sany - 15. Eger múgedek nemese zeınetker óz mártebesin rastasa, jumys berýshi men olardyń ózderi de aqsha tólemeıdi. Árkim óziniń jalaqysy men múmkindigine qaraı saqtandyrýǵa tóleıdi. "Baı adamdar kedeıler úshin, deni saý turǵyndar naýqastar úshin" qarajat salady. Máselen, bir jylda sizder 30 myń teńge kóleminde aqsha aýdarasyz. Al býyndardy almastyrý boıynsha jasalatyn otanyń quny 850 myń teńge tursa, ózge otalardyń baǵasy bir jarym mıllıon teńge kóleminde. Mindetti áleýmettik medıtsınalyq saqtandyrýdyń arqasynda barlyǵy tegin jasalady».
Spıkerdiń aıtýynsha, qorǵa jınalǵan qarjy aqyly medıtsınalyq qyzmetke baǵyttalady. ıAǵnı bul aqsha medıtsına mekemesiniń ınfraqurylymyna jumsalmaıdy degen sóz. Aıta keteıik, Pavlodar oblysynda bes myńnan astam adam óz mártebesin áli de dáleldemegen.