Pavlodar oblysynda qonys aýdarýshylardy qabyldaý kvotasy 100 paıyzǵa oryndaldy

PAVLODAR. QazAqparat - Bıyl Pavlodar oblysynda qandastar men qonys aýdarýshylardy qabyldaýdyń óńirlik kvotasy 100 paıyzǵa oryndaldy, dep habarlaıdy QazAqparat Pavlodarnews.kz saıtyna silteme jasap.

Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasynyń málimetinshe, óńirge aǵymdaǵy jylǵy 1 jeltoqsandaǵy jaǵdaı boıynsha 1365 adam qonystanǵan.
Eńbek kúshin kóshirý eldiń barlyq jumys kúshi artyq óńirlerinen júzege asyryldy. Atap aıtqanda, Almatydan 531 adam, Túrkistan – 492, Jambyl – 135, Qyzylorda – 67, Mańǵystaý – 18, jáne Nur-Sultan – 124, Almaty – 34 jáne Shymkentten 145 adam kóship kelgen.
Qonys aýdarýshylardyń 60 paıyzy oblystyń aýyldyq aımaqtarynda ornalasty.
- Qonys aýdarýshylar qatarynda eńbekke qabiletti jastaǵy 835 adam, 691 bala jáne 20 zeınetker bar. Pavlodar oblysyna kóshkennen keıin eńbekke qabiletti jastaǵy qonys aýdarýshylardyń 625-si nemese 75 paıyzy turaqty jumys oryndarymen qamtamasyz etildi. Óńir kadrlaryna degen qajettilikke sáıkes oblysqa bilim berý jáne aýyl sharýashylyǵy, sondaı-aq densaýlyq saqtaý salasyndaǵy mamandar kóp keldi, - dedi jumyspen qamtýdy úılestirý jáne áleýmettik baǵdarlamalar basqarmasynda.

82 muǵalim, 43 medıtsına qyzmetkeri, 48 mehanızator, 48 aspaz jáne de býhgalterler, elektr gazben dánekerleýshiler, tárbıeshiler, veterınarııa dárigerleri, zańgerler, agrarshylar, elektrıkter, tiginshiler, mádenıet qyzmetkerleri, tehnıkter jáne taǵy da basqa mamandyq ıeleri turaqty jumyspen qamtamasyz etildi.
Pavlodar qalasyna qonys aýdarýshylardyń biri – Almaty oblysy, Qaskeleń qalasynan kelgen Asylqan Qızatov.
- Bul óńirge shilde aıynda otbasymmen qonys aýdardym. Anam, áıelim jáne úsh balam bar. Pavlodardyń adamdary, aýasy, aıazy, tabıǵaty unaıdy. Ózimdi bul jerde jaıly sezinemin. Anamnyń densaýlyǵy úshin de bul óńirdiń aýaraıy jaqsy keledi. Osy jerde túbegeıli qalamyz dep sheshim qabyldadyq. Memlekettik baǵdarlama sheńberinde turǵyn úıdi jaldaý máselesi boıynsha jergilikti organdar kómek kórsetti. Sondaı-aq anam turaqty jumyspen qamtamasyz etildi. Ózim de zańger mamandyǵy boıynsha jumys jasaımyn, - deıdi Asylqan Qızatov.

Oblystyq jumyspen qamtýdy úılestirý jáne áleýmettik baǵdarlamalar basqarmasynda óńirlik kvotalarǵa engizilgen barlyq oralmandar men qonys aýdarýshylarǵa kóshýge sýbsıdııalar tólengenin atap ótti. Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan «Eńbek» memlekettik baǵdarlamasy sheńberinde bekitilgen sharalarǵa sáıkes turǵyn úıdi jaldaý (jalǵa alý) jáne kommýnaldyq qyzmetterge aqy tóleý boıynsha shyǵystar ótelgen.
Aıta keterligi ,2019 jyly Pavlodar oblysyna 2925 adam, ıaǵnı 590 otbasy qonys aýdarsa, 550 qandasymyz kelgen.