Pavlodar oblysynda kıeli jerler kartasyna kiretin mekender anyqtalyp jatyr

ASTANA. QazAqparat - Pavlodarda «Qazaqstannyń kıeli jerler geografııasy» entsıklopedııasyna engiziletin tarıhı oryndar men qasıetti jerler anyqtalýda, dep habarlaıdy pavlodarnews.kz .

Tarıh ǵylymdarynyń doktory, professor Jambyl Artyqbaevtyń aıtýynsha, entsıklopedııaǵa shyǵarylatyn kıeli jerlerdiń tizimine Pavlodar óńirinen birneshe oryn engizilgen. Degenmen bul tizimdi áli de tolyqtyrý kerek.

«Jazda elimizdiń barlyǵyq óńirin qamtıtyn ekspedıtsııa uıymdastyrylady. Sonyń nátıjesinde bes tomdyq entsıklopedııany jaryqqa shyǵaramyz. Qazir sol ekspedıtsııa jumys jasaıtyn qasıetti jerlerdiń tizimin daıyndap jatyrmyz. Qazaqstan boıynsha bir myńǵa jaqyndap qaldy. Al, Pavlodar óńirinen sol tizimge Baıanaýyl aýdanyndaǵy Máshhúr Júsip kesenesin, Qońyr áýlıe mekenin, Ekibastuz qalasyna qarasty Aqkól Jaıylma atyrabyn, Maı aýdanynan Qalmaq qyrylǵan taýyn engizip otyrmyz», - deıdi Jambyl Artyqbaev.

Tarıh ǵylymdarynyń kandıdaty, S.Toraıǵyrov atyndaǵy Pavlodar memlekettik ýnıverıstetindegi tarıh jáne mádenıet ınstıtýtynyń dırektory Qaırat Battalovtyń sózinshe, Pavlodardaǵy «Kıeli jerler geografııasyn» anyqtaý úshin eldi mekenderde turatyn kóne kóz qarııalardyń, jergilikti tarıhshylardyń, ólketanýshylardyń usynys-pikirleri eskeriledi.

«Pavlodar oblysyndaǵy tarıhı oryndardy aralaý úshin komıssııa jasaqtalýda. Onyń quramynda ǵalymdar, tarıhshylar, ólketanýshylar, ertede el basqarǵan azamattar kiredi. Sonymen qatar, jergilikti halyqpen aqyldasamyz. Ekspedıtsııa jumysyn jaz aılarynda júrgizip, kúzge deıin etnografııalyq materıaldardy daıyndap Astanaǵa jiberýimiz kerek. Entsıklopedııaǵa respýblıkalyq mańyzy bar tarıhı oryndarmen qatar, jergilikti deńgeıdegi mańyzdy jerler de kiredi. Eń bastysy - sonyń mańyzdylyǵyn aıqyndaıtyn naqty dálelder taýyp, usynýymyz kerek», - deıdi Qaırat Battalov.