Pavlodar oblysynda bızneske zańsyz qol suqqan 18 qylmys ashyldy
Turǵyndarmen kezdesken Aıdar Tastemirov sybaılas jemqorlyqqa qarsy is-qımyl baǵytynda «Ertis – adaldyq alańy» jobasynyń tıgizgen paıdasyn atap ótti.
«Búginde oblysymyzda «Ertis – adaldyq alańy» jobasy jemisti qyzmet etýde. Sonyń arqasynda bıznes pen ınvestıtsııalardy qorǵaý qolǵa alyndy. Oǵan qosa, jaqynda ótken Úkimettiń keńeıtilgen otyrysynda kásipkerlerdi qadaǵalaýshy, tekserýshi organdardan qorǵaý máselesi kóterilgen bolatyn. Osy oraıda, jyl basynan bastap bızneske zańsyz qol suǵýǵa qatysty 18 qylmys ashyldy», - deıdi Aıdar Tastemirov.
Sondaı-aq ol Qazaqstan Prezıdenti Joldaýda jarııalaǵan «Halyq únine qulaq asatyn memleket» tujyrymdamasynyń tıisti deńgeıde oryndalmaı jatqanyn atap ótti. Osy oraıda, sybaılas jemqorlyqqa qarsy is-qımyl ulttyq bıýrosy departamentiniń basshysy azamattyq qoǵamdy belsendilikke shaqyryp, qarapaıym jandarmen birlese otyryp jemqorlyqqa qarsy kúresti kúsheıtýge bolatynyn aıtty.
Ári qaraı turǵyndar óz suraqtaryn qoıýǵa múmkindik aldy.
Máselen, kásipker Oljas Omarov «Saryarqa» móltek aýdanyndaǵy ekiqabatty tozyǵy jetken úıde ornalasqan ata-anasynyń dúkeniniń taǵdyryna alańdaýshylyq bildirdi. Onyń aıtýynsha, 76 sharshy metrlik úsh bólmeli páter ornyna qalalyq ákimdik nebári eki bólmeli páter usynýda. Onyń ústine, qala basshylyǵy dúkenniń zańsyz qyzmet etkenin alǵa tartýda. Oljas Omarovtyń pikirinshe, osy jerde kásipker múddeleri aıaqqa taptalýda. Oblystyq kólik salasy kásipodaǵynyń tóraǵasy Vasılıı Rýdakov Pavlodardaǵy jeńildikke ıe azamattar sanattarynyń kóptigimen kelispeýshilik tanytty.
«Pavlodarda elimizdiń eshbir jerinde kezdespeıtin jeńildikpen júretin jolaýshylardyń 18 sanaty bar. Bul qalaı júzege asatyny belgili – qala basshylyǵy kúshtep engizedi. Jaǵdaı qıyndap ketti. Sizderdiń kómek berýińizdi suraımyn», - dedi ol.
Aıdar Tastemirov barlyq máselelerdi jiti baqylaýǵa alyp, sheshý joldaryn qarastyratynyna ýáde berdi.