Pavlodar oblysynda aýyl jastary jalǵyzbasty zeınetkerge úı salyp berdi

PAVLODAR. QazAqparat - Sharbaqty aýdanyndaǵy Esilbaı aýylynyń belsendi jastary jalǵyzbasty zeınetkerge arnalǵan eki bólmeli baspananyń qurylysyn eki aıdyń ishinde aıaqtaǵan, dep habarlaıdy QazAqparat Ravlodarnews.kz-ke silteme jasap.

«66 jastaǵy Gúlnash apamyz jalǵyz turady. Esilbaı aýylynda úıi bolǵan edi. Ótken jyly bir bólmesiniń shatyry túsip ketti, jóndeýge kelmeıdi. Ol kisi ózi eshkimnen kómek surap, júgingen emes. Zeınetkerge aýyl jastary úı salyp berýge nıet bildirdi. Birligi jarasqan jastar qysqa ýaqyttyń ishinde baspana turǵyzyp berdi. Osy aptanyń aıaǵynda esigin salyp, aqtaý jumystaryn aıaqtaıdy»,- deıdi Sharbaqty aýdany ishki saıasat jáne tilderdi damytý bóliminiń basshysy Serjan Imanqulov.

30 shaqty adam qurylys materıaldary men kerek-jaraqty satyp alǵan. Buǵan qosa, zeınetkerge jaıly jaǵdaı jasaý úshin tońazytqysh, gaz plıtasy jáne kir jýatyn mashına sııaqty turmys tehnıkalaryn da satyp alyp bermek.
«Úıimniń tóbesin jóndeý kerek bolatyn. Men eshkimge salmaq salyp, kómek suraǵym kelmedi. Árkimniń óz otbasy men jumysy bar. Biraq jastardyń ózderi qolqa salyp, kómek kórsetýge nıet bildirgen soń meselin qaıtarmadym. Aýlanyń ishinen úı salyp, elektr symyn tartty, qurylysty aıaqtaýǵa taıap qaldy. Olardyń bul isine rızashylyǵymdy bildiremin», - deıdi zeınetker.