Pavlodar oblysynda aýyl mektepterinde 8 mln teńge jymqyrylǵany anyqtaldy

PAVLODAR. QazAqparat – Jelezın aýdany mektebiniń esepshisi buryn atalǵan mekemede múldem jumys istemegen eki ulyna aqsha aýdaryp otyrǵan, dep habarlaıdy QazAqparat tilshisi.

«Aýdıtorlar Aqqaıyń aýyly mektep dırektorynyń buıryǵymen esepshiniń 2016 jyldyń mamyrynda jumysqa ornalasqanyn anyqtady. Mekeme esepshisi 2016-2018 jyldary 3 mln 206 myń teńgeni negizsiz tólegen. Sondaı-aq, aýdıtorlar bıýdjet qarjysy bul jerde múldem istemegen esepshiniń eki ulyna da tólengenin anyqtady», - dep habarlady QazAqparat tilshisine Pavlodar oblysy Іshki memlekettik aýdıt departamenti qarjylyq esep aýdıti bóliminiń bas mamany Qýanysh Iseev.

Pavlodar oblysyndaǵy Іshki memlekettik aýdıt departamentiniń memlekettik aýdıtorlary Jelezın aýdanynyń «Aqqaıyń aýylynyń negizgi jalpy bilim berý mektebi» memlekettik mekemesinde jáne «Zaharov negizgi jalpy bilim berý mektebi» memlekettik mekemesinde Pavlodar oblysyndaǵy sybaılas jemqorlyqqa qarsy is-qımyl qaýlysynyń negizinde osy mekemelerdiń esepshileriniń bıýdjet qarajatyn jymqyrý máselesi boıynsha tekseris júrgizdi, dedi aýdıtor.

«Sondaı-aq, esepshi mektep dırektorynyń buıryǵy negizinde 2015 jyldyń qańtarynan «Zaharov negizgi jalpy bilim berý mektebi» memlekettik mekemesinde jumys istegen. Ol jumysqa ornalasqan sátten bastap ózine jáne eki ulyna 3 mln 968 teńge kóleminde bıýdjet qarjysyn aýdaryp otyrǵan», - dedi ishki memlekettik aýdıt departamentinde.

Vedomstvo mamandarynyń habarlaýynsha, Zaharov mektebinde esepshi dırektorǵa 2015-2018 jyldar aralyǵynda 630 myń teńge tólegen.

«Esepshi eki mektepte barlyǵy 7 mln 804 myń teńge bıýdjet qarajatyn jymqyrǵan», - dep eseptedi Q. Iseev.

Avtory Anton Gagarın