Pavlodar oblysynda 3 myńǵa jýyq jumyskerge jalaqy boıynsha qaryzy tólendi

PAVLODAR. QazAqparat - Pavlodar oblysynda byltyr 3 myńǵa jýyq jumyskerge jalaqy boıynsha qaryzy tólenip, eńbek zańnamasyn buzǵan kásiporyndarǵa aıyppul salyndy, dep habarlaıdy QazAqparat Pavlodarnews.kz saıtyna silteme jasap.

Bul týraly oblystyq ákimdikte ótken apparattyq jıynda óńirlik eńbek basqarmasynyń basshysy Asqar Qapanov málim etti.

- 2021 jyldyń qorytyndysy boıynsha oblysta memlekettik ınspektorlar eńbek qatynasyna qatysty 1694 ótinishti qarady. Olardyń kóbi ýaqytyly jalaqy tólemeýge qatysty. Eńbek zańnamasynyń saqtalýyn baqylaý maqsatynda 440 tekserý júrgizildi. 1667 ereje buzýshylyq anyqtaldy. 11,2 mıllıon teńgege 102 aıyppul salyndy, - dedi Asqar Qapanov.

Sondaı-aq 2021 jyly iri kásiporyndardyń kóbi 4-ten 25 paıyzǵa deıin jalaqyny kóterip, «13-shi jalaqyny» tóledi. Olardyń qatarynda: «Qazaqstan alıýmınııi», «Qazaqstan elektrolız zaýyty», Ekibastuzdaǵy 1-MAES kásiporyndary bar.
Jalaqysy tómen kásiporyndar qataryna: «Pavlodarenergo» AQ, «Kastıng» JShS, «KSP Steel» JShS, «Órt Sóndirýshi» AQ jatady.
- 2021 jyly oblystaǵy 118 kásiporyn 297,7 mıllıon teńge somasyna jalaqy boıynsha qaryzdaryn tóledi. Sol arqyly 2805 jumyskerdiń quqyǵy qorǵaldy, - dedi Asqar Qapanov.

Oblys ákimi Ábilqaıyr Sqaqov áleýmettik nysandardyń qurylysynda kóbine «jabaıy toptar» jumys isteıtinin jáne olar eńbek kelisimshartyn jasamaıtynyn atap ótti.
Basqarma basshysy ótken jyly mundaı toptardan aryzdar bolǵanyn aıtty.
- Mundaı jaǵdaıda jumyskerdiń eńbek kelisimsharty bolsa, 100 paıyz jalaqysyn óndirip alady. Bul toptar eńbek kelisimshartyn jasamaǵandyqtan jumys berýshi jumys istelgenin joqqa shyǵarady. Oǵan qosa, moratorıı bolǵandyqtan biz teksere almaımyz. Bundaıda biz zardap shekkenderge aryz jazýǵa kómektesemiz. Ótken jyly isterdiń 50 paıyzy jeńip shyqty. Odan bólek, keıde jumys berýshi emes, jumyskerdiń ózi kelisimshart jasaǵysy kelmeıtin jaǵdaılar bolady, - dedi Asqar Qapanov.

Aımaq basshysy bundaı jaǵdaıdaǵy jumyskerlerdiń eńbek kelisimshartyn jasaǵany týraly aqparat eshqaıda tirkelmeıtinin, ıaǵnı aqparattyq jaǵynan jumys álsiz ekenin synǵa aldy.
- Adamdar óz eńbek quqyǵyn qorǵaý úshin tıisti kelisimshartyn toltyrmaǵan. Ol týraly aqparat eshqaıda joq. Mysaly, ótken jyly Jetekshide mekteptiń qurylysynda, Maıqaıyńda bolǵan oqıǵalar esimde. Onda alǵashqy eńbek kelisimsharty jasalmaǵan. Bulaı jumys isteýdi toqtatý kerek, - dedi Ábilqaıyr Sqaqov.

Aıta keteıik, 2021 jyly oblysta QR Eńbek kodeksin túsindirý boıynsha 151 semınar ótkizilip, 3 myńnan astam adam qamtylǵan.