Pavlodar oblysynda 100-den astam ulttyń ókilderi turady

PAVLODAR. QazAqparat - Merekelik serýen Gagarın atyndaǵy saıabaqta jáne Dostyq úıiniń aldyndaǵy alańda ótti. «Qazaqstan – birlik pen tatýlyqtyń mekeni» atty saltanatty kontsertte qazaqstandyq jáne pavlodarlyq estrada juldyzdary óner kórsetti, dep habarlaıdy QazAqparat.

Oblys ákimi pavlodarlyqtar men qala qonaqtaryn merekemen quttyqtady. Ol Memleket basshysynyń Qazaqstan halqy Assambleıasynyń HHHІ sessııasynda aıtqan «kózqarasymyz ár túrli bolsa da, birtutas ult» qaǵıdatynyń myzǵymastyǵyn eske saldy.

- Halqymyzdyń «Birlik bar jerde tirlik bar» degen qanatty sózi bar, - dedi Ábilqaıyr Sqaqov. – Memleket basshysy óz joldaýynda Jańa Qazaqstan jańǵyrý men jańarý joly ekendigin atap ótti. Oblys turǵyndary elimizde jarııalanǵan saıası reformalardy júzege asyrýda aldyńǵy qatarda keledi.

Kontserttik sahnada qazaqstandyq jáne pavlodarlyq estrada juldyzdary án shyrqady. Baıanaýyl aýdanynyń týmasy Merýert Túsipbaeva jerlesterine arnap «Týǵan jer» ánin oryndady.

Saıabaqtaǵy kórmede kez kelgen adam qolyna qylqalam alyp, kartınany tolyqtyra aldy. Jergilikti qolóner sheberleri serýendeýshilerge ózderiniń óner týyndylaryn kórsetti.

Jas palýandar kúshi men eptilik jaǵynan saıysty. Pavlodarlyqtar men qala qonaaqtary gir tasyn kóterip, arqan tartyp, bilek kúshin tekserip kórdi.

Oblys ákimimen kezdesý kezinde qalalyq qoǵamdyq uıym ókilderi elimizdiń Ata Zańyna ózgerister engizý týraly referendýmdy qoldaıtynyn aıtty.

Olardyń sózinshe, bul qadam - Jańa Qazaqstandy qurýdaǵy mańyzdy sheshimderdiń biri.

Dostyq úıiniń aldyndaǵy alańda Ábilqaıyr Sqaqov óńirlik etnomádenı birlestikter uıymdastyrǵan kórmeni tamashalady.

EMB ókilderi óz ortalyqtarynyń qurylý tarıhy men qyzmeti týraly aıtyp berdi. Dıaspora ókilderi mereke qonaqtaryna ózderiniń ulttyq tátti taǵamdaryn usyndy.

Óńirlik Qazaqstan halqy Assambleıasynyń quramynda júz on alty etnomádenı birlestik bar. Olardyń jıyrma tórti oblystyq deńgeıde tirkelgen, al, toqsan alty qoǵamdyq birlestiktiń qalalyq jáne aýdandyq dárejesi bar.

QHA quramynda Analar keńesi, Aqsaqaldar alqasy, Medıatsııa ortalyǵy, Ǵylymı-sarapshylyq keńes jáne «Assambleıa jastary» respýblıkalyq qoǵamdyq birlestiginiń oblystyq fılıaly qyzmet etedi.

Sýretterdi túsirgen Valerıı Býgaev