Pavlodar oblysynda 10 jyl ishinde EKO arqyly 115 bala dúnıege kelgen
Bul týraly oblystyq densaýlyq saqtaý basqarmasy basshysynyń orynbasary Sáýle Arystanova agenttiktiń joldaǵan resmı saýal hatynda málim etti.
- Óńirde bala súıe almaıtyn juptardyń sany jyl saıyn artyp keledi. Mysaly, 2018 jyly oblystyń medıtsınalyq uıymdarynda dıspanserlik tirkeýge 1911 jup alynsa, 2019 jyly olardyń sany 2115 jupqa jetken. Áıelder bedeýligi - 51%, erler arasynda belsizdik - 49%. 2020 jylǵy 15 qyrkúıektegi jaǵdaı boıynsha 818 erli-zaıypty EKO-ǵa kvota alý kezeginde tur. Bedeýliktiń jas qurylymyna keletin bolsaq, 28-den 42 jasqa deıingi áıelder men 30 jastan jáne odan úlken er adamdarda kezdesedi. Bedeýlik pen belsizdiktiń sebebi kóbinese qabyný genezısine baılanysty, - deıdi Sáýle Arystanova.
Densaýlyq saqtaý basqarmasy usynǵan málimetke súıensek, ekstrakorporaldy uryqtandyrýǵa kvotalar bólý QR Densaýlyq saqtaý mınıstrliginiń 2010 jylǵy 5 qańtardaǵy № 1 jáne 2011 jylǵy 30 naýryzdaǵy № 162 buıryqtaryna sáıkes júzege asyrylady.
Atalmysh baǵdarlama sheńberinde 10 jyl ishinde, ıaǵnı 2010 jyldan 2020 jylǵa deıin, Pavlodar oblysy úshin medıtsınalyq kómektiń kepildendirilgen kólemi úshin EKO-ǵa 335 kvota bólingen. Naqtyraq aıtatyn bolsa, 2010 - 5, 2011 - 18, 2012 - 30, 2013 - 27, 2014 - 27, 2015 - 36, 2016 - 34, 2017 - 38, 2018 - 36, 2019 - 38, 2020 - 46).
- EKO baǵdarlamasynyń tıimdiligi 30-dan 42% -ke deıin quraıdy. Jyl saıyn erli-zaıyptylardy EKO-ǵa kvota boıynsha jibergen kezde olardyń tek úshten bir bóligi oń nátıje beredi. Sondaı-aq olardyń arasynda jartysynda kópjúktilik kezdesedi. Medıtsınalyq kómektiń kepildendirilgen kólemi sheńberinde áıelderdiń bedeýligi trýbno-perıtonealdy faktorǵa baılanysty, erlerdiń belsizdigi aýyr formalary (olıgo, asteno, teratozoospermııa) tirkelgen jaǵdaıda jasandy uryqtandyrý kórsetkishteri bolady. Sondaı-aq olar 19-45 jas aralyǵynda resmı nekede tirkelgen, balalary joq Qazaqstan Respýblıkasynyń azamattary bolýy tıis, - deıdi Sáýle Arystanova.
Bedeýliktiń ártúrli formalary bar naýqastar aýmaqtyq emhanalardyń janyndaǵy dıspanserge tirkelip, sodan keıin densaýlyq saqtaý bólimine kezekke qoıylady.
Erli-zaıyptylar Densaýlyq saqtaý mınıstrliginiń memlekettik tapsyrysyn alatyn EKO ortalyqtarynyń birin tańdaýǵa quqyly.
Kezektilikke sáıkes patsıentter ortalyqtardyń birine (óz qalaýy boıynsha) irikteýden ótý jáne komıssııa sheshimin qabyldaý úshin jiberiledi.
EKO ortalyqtary komıssııalarynyń sheshiminiń nátıjeleri boıynsha erli-zaıyptylarǵa kvotaǵa joldama bólinedi.
Eske sala keteıik, Qazaqstan halqyna Joldaýyn jarııa etken QR Prezıdenti Qasym-Jomart Toqaev Úkimetke 2021 jyldan bastap «Ańsaǵan sábı» arnaýly baǵdarlamasyn iske qosýdy jáne «EKO» baǵdarlamasymen kvotany 7 myńǵa deıin, ıaǵnı, 7 ese kóbeıtýdi tapyrǵan bolatyn.