Pavlodar oblysyna tórt jylda 2,1 myń qandas kóship keldi
Pavlodar oblysyna jumys sapary aıasynda QR Premer-Mınıstriniń orynbasary Eraly Toǵjanov óńirlik kóshi-qon saıasatynyń negizgi baǵyttarymen tanysty.
«Eńbek» memlekettik nátıjeli jumyspen qamtý jáne jappaı kásipkerlikti damytý baǵdarlamasy sheńberinde 2017-2021 jyldary oblysqa 11388 adam nemese 2413 otbasy kóship keldi. Olardyń ishinde, 2162 qandastar men 9226 kóship kelýshiler. Qonys aýdarýshylar men qandastardy qabyldaýdyń jyl saıynǵy óńirlik kvotasy 100% oryndalady.
E.Toǵjanov Úkimet tarapynan azamattardy jańa jerge ıntegratsııalaý úshin barlyq qajetti jaǵdaı jasalyp jatqanyn, jeńildikter beriletinin, jumys oryndary ashylatynyn atap ótti.
«Pavlodar oblysy – qonys aýdarýshylar baǵdarlamasyn júzege asyrý boıynsha kóshbasshy, sol úshin óńir basshylyǵyna alǵysymdy bildiremin. Bul baǵdarlama boıynsha adamdar jumys kúshi artyq óńirlerden ǵana emes, shetelden de kóship keledi. Qandastardyń elimiz ıgiligine qosqan úlesin umytpaý kerek», — dedi vıtse-premer.
Bıyl óńirde qonys aýdarýshylar men qandastardy qabyldaý kvotasy 3600 adamdy quraıdy. Búgingi kúni óńirlik kvotaǵa 1257 adam nemese jospardyń 34,9% engizildi. Qonys aýdarýshylardyń eń kóp sany Pavlodar jáne Ekibastuz qalalaryna keldi. Oblystyń Aqtoǵaı, Pavlodar jáne Ýspen aýdandarynda kvotanyń oryndalýy ortasha kórsetkishten joǵary.
Eńbek kúshin kóshirý jumys kúshi artyq óńirlerden júzege asyrylady. Basym kópshiligi Túrkistan, Almaty jáne Jambyl oblystarynan keledi. Olardyń qatarynda bilim berý jáne aýyl sharýashylyǵy, sondaı-aq densaýlyq saqtaý salasyndaǵy mamandar kóp.
Eńbekke qabiletti 536 azamattyń 369-y turaqty jumysqa ornalastyryldy, 6 adam grant aldy jáne 1 adam oqýǵa jiberildi. Halyqtyń kóp sany aýyldyq jerlerde jáne oblys qalalarynda qonystandy.
Foto: primeminister.kz