Pavlodar oblysyna Pfizer vaktsınasynyń 29 myń dozasy kelip tústi

PAVLODAR. QazAqparat – Vaktsınanyń kelip túsken tolyq kólemi Ǵ. Sultanov atyndaǵy oblystyq aýrýhananyń ortalyq qoımasyna saqtaýǵa jiberildi, dep habarlaıdy QazAqparat tilshisi.

«Pavlodar oblysyna «Komırnatı» (Pfizer) vaktsınasynyń 29250 dozasy kelip tústi», - dep habarlady Pavlodar oblysy densaýlyq saqtaý basqarmasynyń baspasóz qyzmeti.

Oblystyq densaýlyq saqtaý basqarmasynyń málimetinshe, preparattyń birinshi komponenti Pavlodarǵa áýe kóligimen jetkizilgen.

Vaktsınanyń kelip túsken barlyq kólemi Ǵ.Sultanov atyndaǵy oblystyq aýrýhananyń ortalyq qoımasyna saqtaýǵa jiberildi.

«Búgingi tańda Pavlodar oblysynda 63180 adam «Komırnatı» («Pfizer») vaktsınasyn alýy tıis. Bastapqy kezeńde 9917 adamdy, onyń ishinde 16 jastan 17 jasqa deıingi 6076 balany, júktiliktiń 16-37 apta kezeńinde júrgen 1508 júkti áıeldi jáne bosanǵannan soń 42 kún ótkennen keıin 2333 áıeldi egý kózdelip otyr», - dep naqtylady vedomstvo.

Sondaı-aq, vedomstvo óńirde Tselsıı shkalasy boıynsha -90-nan -60 gradýsqa deıingi tómen temperatýrada vaktsınany saqtaýǵa arnalǵan 4 muzdatqysh jabdyq bar ekenin jáne Pavlodar oblysynyń medıtsınalyq uıymdaryndaǵy vaktsınalardy saqtaý jáne egý pýnkterine deıin tasymaldaý boıynsha salqyndatý tizbeginiń baǵyty ázirlengenin aıtty.