Pavlodar oblysy: «Serpin-2050» baǵdarlamasymen 1677 stýdent bilim alýda
Sharaǵa oblys ákiminiń orynbasary Meıram Begentaev pen memlekettik qurylymdardyń ókilderi qatysty.
Pikiralmasý alańynda jastardy jumysqa ornalastyrý, jumyspen qamtý, memleket tarapynan kórsetiletin qoldaý túrleri týraly sóz qozǵaldy.
Oblystyq bilim berý basqarmasy tehnıkalyq jáne kásiptik bilim berý bólimi basshysynyń mindetin atqarýshy Alma Aıtýarovanyń aıtýynsha, búgingi tańda óńirde atalmysh baǵdarlama boıynsha 1677 stýdent bilim alady.
Bıyl oqýyn aıaqtaıtyn 539 jastyń 413-i joǵary oqý oryndarynyń, 126-sy kolledjderdiń stýdentteri. Pedagogıkalyq mamandyq boıynsha 146 adam, tehnıkalyq baǵytta 393 adam jas maman qataryna qosylady. Olardyń barlyǵy oqý orny janyndaǵy jataqhanada turady. Stýdentterdi daıarlaý eńbek naryǵynda suranysqa ıe tehnık-elektrık, tehnık-baǵdarlamalaýshy, mal dárigeri sııaqty mamandyqtar boıynsha júzege asyrylady.
- Byltyrǵy jyly serpkindikterdiń alǵashqy legi qoldaryna dıplomdaryn aldy, - deıdi Alma Aıtýarova. - Onyń ishinde 67 adamnyń 14-i oblysta qaldy. Bıyl oqý ornyn aıaqtaǵan 174 stýdenttiń 86-sy jumysqa ornalasty, 35-i joǵary oqý oryndarda bilimin jalǵastyrdy. 36 adam túrli sebeptermen óz óńirlerine qaıtyp oraldy.
Jastar bastamalaryn damytý ortalyǵynyń jetekshisi Tólegen Aıtbaev stýdentterdiń arasynda baspana jáne jumysqa ornalasýǵa qatysty kóptegen qıyndyqtar bar ekenin aıtady.
- Osyǵan baılanysty memlekettik qurylymdardyń ókilderi túrli baǵdarlamalar týraly baıandady, - deıdi Tólegen Aıtbaev. - Kóbinese jastardy «7-20-25» jáne «Dıplommen aýylǵa» baǵdarlamalary qyzyqtyrdy. Stýdentterdi ortalyqtyń jumysymen tanystyrdyq. Bul jerge olar kún saıyn «Bir tereze» júıesi boıynsha ártúrli keńes ala alady.
Óńirlik jumyspen qamtý jáne áleýmettik baǵdarlamalar basqarmasy basshysynyń orynbasary Helýa Qashkenova usynǵan málimetke súıensek, qonys aýdarýshylarǵa kórsetiletin memlekettik qoldaý aıasynda otbasy músheleriniń árqaısysyna 35 AEK - 84175 teńge kóleminde jolaqyǵa járdemaqy beriledi.
Baspana jalǵa alý, kommýnaldyq qyzmet tólemaqysy shyǵyndary ótelip, qyzmettik baspana usynylady jáne jumysqa ornalasýǵa kómek kórsetiledi.
Máselen, Sharbaqty aýdanynda týǵan Olga Makısheva Astana qalasynda joǵary oqý ornyn aıaqtaǵannan keıin týǵan jerine oralǵan.
- Kúıeýimmen jáne balalarymen aýdanyma qaıtyp keldim, - deıdi ol. - Ortalyq aýdandyq aýrýhanada terapııa bóliminiń meńgerýshisi bolyp jumys isteımin. Kelgen kezde ýaqytsha baspana usyndy. Budan keıin páter satyp alýǵa qolaıly sharttarmen qaryz aldyq. Páterdi ózimiz tańdap aldyq. Sonymen qatar ekeýmizge de kótermeaqy berildi.
Eske sala keteıik, byltyr oblysta «Serpin-2050» baǵdarlamasy boıynsha bilim alǵan jastardyń 47-si nemese 70 paıyzy óz óńirlerine oralǵan. Atalmysh memlekettik áleýmettik baǵdarlama óńirimizde 2014 jyldan bastap júzege asyrylýda.