Pavlodar oblysy ákiminiń orynbasary otstavkaǵa ótinish berdi

PAVLODAR. QazAqparat – Pavlodar oblysy ákiminiń orynbasary Aızada Qurmanova qaramaǵyndaǵy qyzmetkerdiń para alýyna baılanysty otstavkaǵa ketý týraly ótinish berdi. Degenmen óńir ákimi ony qabyldamady. Bul týraly Pavlodar oblysy ákiminiń baspasóz qyzmeti málim etti, dep habarlaıdy QazAqparat tilshisi.

Ákimdik dereginshe, otstavkaǵa ketý ótinishin bergen Aızada Qurmanova bilim berý, densaýlyq saqtaý, mádenıet, jastar saıasaty jáne áleýmettik salalarǵa jetekshilik etedi.

«Aızada Qurmanovanyń qaramaǵyndaǵy Mádenıet, tilderdi damytý jáne arhıv isi basqarmasynyń burynǵy basshysy sybaılas jemqorlyq faktisi boıynsha aıyptaldy. Tıisinshe, para alǵan qyzmetkerge qatysty shyqqan úkim kúshine endi. Sondyqtan ákimniń orynbasary otstavkaǵa ketpek bolǵan. Degenmen oblys basshysy Ábilqaıyr Sqaqov ony qabyldamaı, ornyna qatań sógis jarııalady», - delingen ákimdiktiń baspasóz qyzmeti taratqan habarlamada.

Eske salaıyq, buǵan deıin orynbasarynyń jemqorlyǵy úshin Ekibastuzdyń ákimi otstavkaǵa ketken bolatyn .