Pavlodar oblysy ákimdigi aldaǵy saılaýǵa qatysatyn úmitkerler týraly aqparaty teriske shyǵardy

ASTANA. QazAqparat – Pavlodar oblysy ákiminiń baspasóz qyzmeti Májilis jáne máslıhat saılaýlaryna qatysatyn úmitkerler týraly tarap jatqan aqparaty teriske shyǵardy, dep habarlaıdy QazAqparat tilshisi.

Buǵan deıin jelide Pavlodar oblysynyń Sharbaqty aýdanynda máslıhat saılaýynyń jeńimpazdary qazirdi ózinde belgili bolyp qoıǵany týraly málimet taraǵan bolatyn.

«Qazirgi tańda BAQ pen áleýmettik jelide oblys aýdandarynyń birinde Parlament Májilisi men túrli deńgeıdegi máslıhattar depýtattarynyń aldaǵy saılaýyna negizgi jáne balama kandıdattardyń tizimi týraly aqparat taratylýda. Bul aqparat shyndyqqa janaspaıdy. Qala men aýdan ákimdikteri mundaı jumystardy júrgizbeıdi», - delingen resmı málimette.

Ákimdik saılaý protsesin uıymdastyrýmen aýmaqtyq saılaý komıssııalary aınalysaatynyn eske salady.

«Jergilikti atqarýshy organdar óz kezeginde daýys berýge arnalǵan ýchaskelerdi ornalastyrý úshin qajetti ınfraqurylymmen qamtamasyz etedi. Sonymen qatar, saılaýshylar tizimin qalyptastyrý boıynsha sharalar qabyldaıdy», - dep tolyqtyrdy ákimdik.