Pavlodar oblysynyń ákimi: Baıanaýyldaǵy órt oqshaýlandy

<p>PAVLODAR. KAZINFORM &ndash; Pavlodar oblysy Baıanaýyl aýdanynyń Qaraǵandy óńirimen shekaralas aýmaǵyndaǵy órt oqshaýlandy. Órtti joıý jumystary jalǵasyp jatyr. Óńirde qurbandar men zardap shekkender joq.&nbsp;</p>

Bul týraly Pavlodar oblysynyń ákimi Asaıyn Baıhanov telegram arnasynda habarlady. 

«Keshe shuǵyl túrde dala órtiniń Qaraǵandy oblysynan Baıanaýyl memlekettik ulttyq tabıǵı parkiniń ormansyz aýmaǵyna ótken Baıanaýyl aýdanyna bardym. Órt shalǵan jerdiń aýmaǵy shamamen 6 myń gektardy quraıdy. Jaǵdaı qalyń ósken shópterdiń jáne 12-15 m/s ekpindi jeldiń saldarynan kúrdelenýde. Órt oshaqtaryn joıý ornynda óńirlik jedel shtabtyń otyrysyn ótkizdim. Tilsiz jaýmen kúresýge barlyq qajetti kúsh tartyldy: 310 adam, 51 arnaıy tehnıka, 2 tikushaq, 3 ushqyshsyz ushý apparaty (UUA) jumys istep jatyr. Qazirgi ýaqytta órt oqshaýlandy, órtti joıý jalǵasýda. Óńirde qurbandar men zardap shekkender joq», - dep jazdy Asaıyn Baıhanov.

Foto: AsaiynBaikhan telegram arnasynan

Óńir basshysy mundaı dala órtteriniń negizgi sebebiniń biri – shóp shabý kezinde qoldanylatyn tehnıkalardaǵy ushqyn sóndirgish qurylǵylardyń istemeýinen dep esepteıdi.

«Sondyqtan barlyq sharýa qojalyǵynan mindetti túrde ushqyn sóndirgish qurylǵylar bolýy tıis qoldanystaǵy tehnıkalardy tekserýdi, sondaı-aq óz sharýashylyqtary men úıleriniń, ásirese, shóp qory saqtalatyn oryndardyń aınalasyn ýaqytynda jyrtýdy suraımyn», - dep qosty A.Baıhanov.

Eske sala keteıik, Baıanaýylda jer órtenip, bir aýyldyń turǵyndary qaýipsiz aýmaqqa kóshirildi.