Pavlodar oblysynyń 10 óńiri jaryqsyz qaldy

<p>&laquo;Qazgıdromettiń&raquo; habarlaýynsha keshe Pavlodar oblysyndaǵy jeldiń jyldamdyǵy keı jerlerde sekýndyna 37 metrge deıin jetken. Saldarynan Pavlodar qalasy men 10 óńirde jaryq óship, 5 ǵımarattyń tóbe jabyndylary ushyp ketken, dep habarlaıdy <a href="Kazinform." target="_blank" rel="noopener">Kazinform.</a></p>

Pavlodar oblysy ákiminiń baspasóz qyzmeti taratqan málimetke súıensek, elektr jaryǵynyń avarııalyq ajyraýy Pavlodar qalasynan bólek, Aqqýly, Aqtoǵaı, Baıanaýyl, Ertis, Pavlodar, Tereńkól, Ýspen, Sharbaqty aýdandarynda, Ekibastuz ben Aqsýdyń aýyldyq aımaqtarynda baıqaldy. Jalpy sany 117 eldi meken jaryqsyz qalǵan.

Oblys ortalyǵynda elektrmen qamtamasyz etý sharalary aıaqtalyp qalsa, ózge aýmaqtarda bul jumys áli de jalǵasyp jatyr. Saǵat 11.00-degi jaǵdaı boıynsha 69 aýyldyq eldi mekenge jaryq qosyldy. Avarııalyq qosý jumystaryna 56 jóndeý brıgadasy, barlyǵy 168 adam men 56 tehnıka jumyldyrylǵan.

Qatty jelden Aqsý qalasyndaǵy №7 mektep pen Maı aýdanyndaǵy Aqjar, Saty, Aqshıman aýyldyq mektepteriniń, Aqqýly aýdany Qazy aýylyndaǵy mádenıet úıiniń shatyrlary buzylǵan. Qazirgi ýaqytta keltirilgen zalal eseptelip jatyr. Sondaı-aq oblys aýmaǵy boıynsha keshe túnde respýblıkalyq mańyzǵa ıe joldardyń 12 ýchaskesinde jáne oblystyq joldardyń 11 bóliginde shekteý engizildi. Joldar boıyndaǵy jylytý pýnktterine 73 eresek pen 5 bala ornalastyrylǵan. Ótkizý pýnktterinde 108 tehnıka aıaldap qaldy.

«Qazirgi ýaqytta respýblıkalyq mańyzy bar joldardyń 2 ýchaskesinde ǵana shekteý saqtalyp tur, qalǵany ashyq. Departamenttiń qurylymdyq bólimshelerimen joldan shyǵyp ketken birneshe avtokólik shyǵarylyp, 8 adam qutqaryldy», - dep habarlady Pavlodar oblysy tótenshe jaǵdaılar departamenti daǵdarys jaǵdaılarynda basqarý basqarma bastyǵy Asqarbek Omarov.

Keshe keshkilik Baıanaýyldyń Jańajol aýyldyq okrýginde 1975 jylǵy azamat boranda adasyp, tabylǵany týraly habarlaǵan edik. 

Eske salyp óteıik, keshe Pavlodar oblysynda barlyq baǵyttaǵy joldar jabylyp, kóptegen eldi mekenderde jaryq óship qaldy. Sonymen qatar dúleı daýyldyń saldarynan Pavlodarda 52 mln teńgeniń shyrshasy qulap qalǵan bolatyn.