Pavlodar oblysyndaǵy qurylysy sozylyp ketken 5 nysan jiti nazarda – Antıkor

<p>PAVLODAR. KAZINFORM &mdash; Aqsý qalasyndaǵy ortalyq qazandyq, Baıanaýyldyń Jumat Shanın aýylyndaǵy aýyz sý qubyry, Aqsý qalasyndaǵy 9 qabatty úı qurylystaryn Antıkor qyzmeti nazarda ustap otyr. Buǵan qosa, Pavlodardyń áýejaı qalashyǵyndaǵy 2 nysannyń qurylysy &laquo;saqaldy&raquo; qurylysqa aınalyp úlgergen. &nbsp;</p>

Qurylysyna 11 mlrd teńge jumsalǵan Aqsýdaǵy energetıkalyq nysan 2019 jyly paıdalanýǵa berilýi kerek edi. Alaıda qazandyq jobasyndaǵy áý basta jiberilgen kemshilikter oǵan múmkindik bermeı otyr. Merdiger «KBI Energy» byltyr qujattamalaryn túzetip, «Memlekettiksaraptama» RMK-nyń oń qorytyndysyn alǵan. Deıturǵanmen, bul qazandyqtyń kúl shyǵarý júıesindegi tehnologııalar áli de jetildirýdi qajet etedi. Jańa kásiporyndy iske qosý jumystary shamamen sáýir-mamyr aılarynda júrgizilýi múmkin.

Al 394 mln teńgeni utyp alǵan «Kólsaı Stroı» JShS 3 jyldan beri aıadaı ǵana aýylǵa aýyz sý qubyryn tarta almaı otyr. Jumat Shanın aýylynyń turǵyndary ózderi qazyp alǵan jeke qudyqtarynyń sýyn qanaǵat tutýǵa májbúr. Eldi mekende qazir nebári 80-ge jýyq úı bar. Sanıtarııalyq organdar mundaǵy aýyz sýdyń normasy talapqa saı emes ekenin eskertip keledi. Alaıda «Kólsaı Stroı» kompanııasy asyǵar emes. Anyqtaǵanymyzdaı, seriktestiktiń ózi Shymkentte ornalasqan. Jazda jer qazý jumystaryna paıdalanylǵan tehnıkalar Qaraǵandy qalasynan jaldanyp alynypty. Qazir qysqa baılanysty qurylys jumystary tolyq toqtap tur. Nysannyń paıdalanýǵa beriletin merzimi ázirge belgisiz.

Foto: Pavlodar oblystyq antıkor qyzmeti

«Aqsýdaǵy qazandyq pen Baıanaýyldaǵy aýyz sý qubyry jobalarynan bólek, Aqsýdaǵy kópqabatty úıdiń, oblys ortalyǵyndaǵy áýejaı qalashyǵy boıynsha 2 nysannyń qurylysy merziminen qatty keshigip jatyr. Bul nysandardy qazir óz baqylaýymyzda ustap otyrmyz. Jalpy byltyr respýblıka boıynsha 156 problemaly qurylys nysany anyqtalǵan. Sonyń ishinde bizdiń óńirlik departament 10 «saqaldy» qurylys nysanyn baqylaýǵa alǵan. Departament pen jergilikti atqarýshy organdardyń birlesken jumysynyń nátıjesinde ótken jyly 5 mańyzdy nysandaǵy qurylys jumystary tolyq aıaqtaldy. Olar – Baıanaýyldaǵy 4 aýyz sý qubyry jobasy jáne Pavlodar qalasyndaǵy №28 kópqabatty úı», - dep málim etti Sybaılas jemqorlyqqa qarsy is-qımyl agenttiginiń óńirlik departamentinen.