Pavlodar oblysynda jedel járdem shaqyrýshylar sany kúrt ósti

<p>PAVLODAR. KAZINFORM &mdash; Kúnniń ysı túsýine baılanysty sozylmaly aýrýmen aýyratyn turǵyndar tarapynan qońyraýlar jıilep ketken. Ótken jeksenbide 103 operatoryna 900-den astam shaqyrtý túsken.</p>

Ádette táýligine 650-700 qońyraý qabyldaıtyn óńirlik jedel járdem qyzmeti sońǵy kúnderi shaqyrtýlardyń jıilep ketkenin habarlady.

«Gıpertonııalyq naýqastardan, ınsýlt pen ınfarktqa beıim naýqastardan shaqyrtýlar sany artty. Sońǵy birneshe kúnde qoǵamdyq oryndarda adamdardyń esinen tanyp qalýyna qatysty qońyraýlar da jıiledi. Tek bir ǵana jeksenbi kúni shaqyrtýlar sany 900-den asyp ketti. Turǵyndardan ystyq kúnderi kóshege az shyǵýǵa, ózimen birge sý alyp júrýge, bas kıim kııýge jáne ashyq tústi kıim kıip júrýge keńes beremiz», - deıdi oblystyq jedel járdem stansasy basshysynyń orynbasary Irına Mışenko.

Jedel járdem qyzmeti buǵan qosa jol-kólik apattaryna baılanysty shaqyrtýlardyń sany ósip otyrǵanyn aıtady. Tek bir ǵana 16 maýsym kúni oblys ortalyǵynyń medıtsınalyq brıgadalary 4 oqıǵa ornyna shyqqan.

Oblys aýmaǵynda sońǵy úsh táýlikte kúndizgi aýa temperatýrasy 30-32 gradýsqa deıin jetip tur.

Eske sala keteıik, Grekııada aptap ystyqqa baılanysty mektepter men Akropol jabyldy.