Pavlodar oblysynda shybyn-shirkeıge qarsy hımııalyq óńdeletin aýmaq kólemi ulǵaıady

<p>PAVLODAR. KAZINFORM - Óńdeý jumystary úshin 157 tonna &laquo;Baktıtsıd&raquo; jáne 11,5 myń lıtr hımııalyq preparattar satyp alynbaq. Qalalyq jerlerden bólek, 4 aýdanda barerlik óńdeý júrgiziledi.</p>

Pavlodar oblysy jer qoınaýyn paıdalaný, qorshaǵan orta jáne sý resýrstary basqarmasynyń basshysy Áıgerim Qabyltaevanyń aıtýynsha, bıyl kóktem men jazda óńirde jalpy aýmaǵy 127 myń gektar alqapty shybyn-shirkeıge qarsy óńdeý josparlanyp otyr. Bul ótken jylmen salystyrǵanda 55,5 myń gektarǵa kóp.

«Munyń ishinde 30 myń gektary Pavlodar aýdany boıynsha óńdeledi. Sebebi shybyn-shirkeıdiń kóp bóligi Ertis ózeniniń atalǵan aýdandaǵy jaıylmalarynan qanattanýy múmkin degen boljam bar. Áýeden preparattar shashý úshin 8 AN-2 ushaǵy jumyldyrylsa, olardyń teń jartysy Ertis, Aqtoǵaı, Jelezın jáne Tereńkól aýdandaryndaǵy aýmaqtarǵa baǵyttalady. Al jergilikti merdiger qalalyq jerlerdegi saıabaqtar men skverlerdi óńdese, oblystyq deńgeıdegi merdiger Ertis ózeni boıynda ornalasqan 59 eldi mekende barerlik óńdeý sharalaryn júrgizedi. Bul bir merdigerdiń jaýapkershiligin ekinshi kompanııaǵa aýdarý jaıttarynyń aldyn alady. Sondaı-aq bıyl aspaly búrikkishtermen qosa, 80 metrge deıingi radıýsıy qamtıtyn ónerkásiptik tútindetkish generatorlar da qoldanylady», - dep málimdedi basqarma basshysy.

Byltyrǵy óńdeý jumystarynyń tıimdiligi – 90 paıyz. Aldaǵy úsh jylda óńdeý jumystary úshin «VıkLTD» JShS jaýap berse, «Bıosfera» kompanııasyna ǵylymı súıemeldeý senip tapsyryldy.

Sonymen qatar bıyldan bastap Ertis ózeniniń negizgi arnasynyń 1800 shaqyrymy úsh qaıtara óńdelmek. Qosymsha Belaıa, Podstepka, Teplaıa, Túlki, Tallınka, Karatýn, Orlovka saǵalaryna preparat shashylady.