Pavlodar oblysynda sábiz ben kartop dalada shashylyp jatyr

<p>PAVLODAR. KAZINFORM - Áleýmettik jelilerde qar ústinde tonnalap shashylyp jatqan sábiz ben kartoptyń beınejazbasy tarady. Beınejazbany túsirýshi áıel adam onyń Pavlodar oblysyndaǵy Aqtoǵaı aýdanyna aparatyn jol boıynda jatqanyn jetkizgen.</p>

Vıdeony túsirýshi adam ıen dalada taý-taý bolyp shashylyp jatqan sábiz ben kartopty kez kelgen adam qalaǵanynsha alyp kete alady dep baıandaıdy. Ári ol jer Pavlodardan Aqtoǵaıǵa baratyn avtojoldyń 63-shi shaqyrymynda dep kórsetilgen.

Áleýmettik jelide bul vıdeonyń astyna jurtshylyq júzdegen pikir jazyp qaldyrǵan. Turǵyndardyń oıynsha, «fermer mol ónimdi dalaǵa laqtyrmaı kópbalaly otbasylar men jalǵyzilikti adamdarǵa, jetimder men qarttar úıine taratyp berýi kerek edi. Tipti bolmaǵanda, jaqyn mańdaǵy aýyldarǵa aparyp berse, jergilikti adamdar maldaryna týrap berer edi»,-dep esepteıdi kópshilik.

Belgili bolǵandaı, aýyl sharýashylyq ónimderi jergilikti fermerlik sharýashylyqtan shyqqan.

«Bul vıdeoda Aqtoǵaı aýdanynyń Isanterek aýylynda ornalasqan «Molochnoe selo» fermerlik qojalyǵynyń óndiristik qaldyqtary: tanaptardaǵy qarashirik, ósimdikterdiń sabaqtary jáne satýǵa, saqtaýǵa jaramsyz ónim kórsetilgen. «Molochnoe selo» fermerlik qojalyǵy óndiris qaldyqtaryn jáne kondıtsııalyq emes ónimderdi turǵyndardyń sharýashylyq muqtajdyqtary úshin irikteýine ruqsat etilgen arnaıy bólingen aýmaqqa shyǵarýdy júzege asyrady. Odan ári ol qaldyqtar egistikterge aparyp tógiledi»,-dedi Aqtoǵaı aýdandyq kásipkerlik jáne aýyl sharýashylyǵy bóliminen.

Mundaı jaǵdaı bıyl kóktemde de bolǵany týraly jazǵan edik.