Pavlodar oblysynda órt oqıǵalarynyń 80%-y turǵyn úı sektorynda bolady

<p>PAVLODAR. KAZINFORM - Pavlodar oblysynda qysqy jylytý kezeńinde órt oqıǵalary jıilep ketedi. Ótken jylý maýsymynda 77 órt tirkelip, saldarynan 6 adam qaza tapqan.</p>

Oblystaǵy órtterdiń 70-80%-y turǵyn úı sektorynda bolady. Jalpy órt oqıǵalarynyń 65%-y jylytý kezeńinde bolatyny baıqalǵan. Máselen, byltyrǵy jylý maýsymynda óńirdegi turǵyn úı sektorynda 77 órt tirkelgen.

- Ótken jylý maýsymyndaǵy 77 órtten 6 adam qaza tapty. Taǵy 10 adam jaraqat alǵan. Turǵyn úı sektoryndaǵy órtter men ólimderdiń kópshiligi ishkilikke salynǵan nemese áleýmettik osal otbasylarynda jıi bolady. Al tilsiz jaýdyń paıda bolý sebepteri ártúrli. Eń negizgisi - salǵyrttyq. Turǵyn úı sektorynda elektr jabdyqtary men turmystyq aspaptardy montajdaý men paıdalanýdaǵy buzýshylyqtar, peshterdi ornatý jáne paıdalaný kezinde órt qaýipsizdiginiń buzylýy jıi kezdesedi. Qazir kún salqyndady. Turǵyndar túrli jylytqyshtardy paıdalanady. Keıde elektr jelilerinde qysqa tuıyqtalý bolyp, órt shyǵady, - deıdi óńirlik tótenshe jaǵdaılar departamenti bastyǵynyń orynbasary Qaırat Shaımardanov.

Departament jergilikti polıtsııa qyzmetimen, atqarýshy organdarmen jáne volonterlik uıymdardyń ókilderimen birlesip órttiń, adamdardyń qaza bolýy men jaraqattanýynyń aldyn alý maqsatynda turaqty negizde halyqpen profılaktıkalyq is-sharalar ótkizedi.

Arnaıy esepte halyqtyń áleýmettik osal tobyna jatatyn 1 233 turǵyn úı bar. Jergilikti atqarýshy organdar men úkimettik emes uıymdardyń qarajaty esebinen ýly gazdyń shyqqany týraly dabyl beretin 275 datchık ornatylǵan.

Eske sala keteıik, Pavlodarda jeke sharýanyń úıýli turǵan 40 tonna shóbi órtenip ketti.