Pavlodar oblysynda orman órtteri 3,5 esege azaıǵan

<p>PAVLODAR. KAZINFORM &mdash; Bıylǵy sáýir aıynan beri Ertis-Baıan óńirindegi orman-toǵaılarda 28 órt oqıǵasy tirkelgen. Al byltyr dál osy kezeńde 134 jaǵdaı bolǵan.</p>

Tótenshe jaǵdaı qyzmetiniń ókilderi orman órtteriniń azaıýyna bıylǵy aýa raıynyń kóktemnen beri ylǵaldy bolyp turǵany sebep deıdi.

Foto: Pavlodar oblysy Óńirlik kommýnıkatsııalar qyzmeti

«Jyl basynan beri orman órtteriniń byltyrǵymen salystyrǵanda 3,5 esege azaıǵanyn baıqap otyrmyz. Byltyr dál osy mezgilde tilsiz jaý jıi qaıtalanyp, oqıǵalar sany ósip ketse, bıyl kerisinshe azaıa tústi. Mysal úshin, bıyl sáýir aıynan beri 28 órt oqıǵasy tirkelip, 2,9 gektar jerdi jalyn sharpydy. Al byltyr bul mezgilde 134 oqıǵa bolyp, 2723 gektar orman alqaby órtengen. Kóktemniń kesh kelgeni, onyń ústine jazǵyturym erigen qar sýynyń mol bolǵany jergilikti jerdiń aýa raıyn áli de ylǵaldandyryp tur. Soǵan baılanysty órt qaýipti kezeń birqalypty ótip jatyr», - deıdi Pavlodar oblysy Tótenshe jaǵdaılar departamenti bastyǵynyń mindetin atqarýshy Qaırat Shaımardenov.

Bıylǵy órtterdiń 23-i naızaǵaıdyń túsýinen paıda bolǵan. Buǵan qosa sáýir aıynda «Ertis ormany» rezervatynda iske qosylǵan orman órtterin erte anyqtaý júıesi de ormanshylarǵa úlken kómek bolyp tur.

Mundaı keshendi júıe keler jyly Baıanaýyl aýdanynda da paıda bolady degen jospar bar.

Eske sala keteıik, jýyqta májilismender «Ertis ormany» qoryǵynyń máselesimen tanysqany týraly jazǵan edik.