Pavlodar oblysynda qyzylsha derti órship tur

<p>PAVLODAR. KAZINFORM &mdash; Jyl basynan beri qaýipti aýrýdy 506 adam juqtyrǵan. Onyń 70 paıyzy &mdash; vaktsına salynbaǵan balalar.</p>

Bul týraly Óńirlik kommýnıkatsııalar qyzmetinde ótken brıfıngte óńirlik sanıtarııalyq-epıdemıologııalyq baqylaý departamenti basshysynyń orynbasary Zámzagúl Dosjanova málim etti.

«Qyzylsha aýrýyna shaldyqqan naýqastardyń sany artýda, sońǵy bir jarym aıda 506 jaǵdaı tirkelgen. Juqpaly dertpen aýyryp qalǵandardyń 71 paıyzy — ata-analary vaktsına salǵyzýdan bas tartqan balalar. Qazir Pavlodar oblysy aýmaǵynda qyzylshaǵa qarsy qosymsha jappaı ımmýndaý júrgizilýde. Búginde 32 myńnan astam adamǵa ekpe salyndy», dep habarlady ol.

Ótken jyldyń qazan aıynan bastap oblysta jiti respıratorlyq vırýstyq ınfektsııalardyń 375 myńǵa jýyq jaǵdaıy tirkelgen. Koronavırýs boıynsha jaǵdaı turaqty. Bıylǵy qańtarda — 34, al aqpan aıynyń basynan beri 10 jaǵdaı tirkelgen.