Pavlodar oblysynda qystaqtarǵa bir mıllıonnan asa mal kirdi

<p>PAVLODAR. KAZINFORM -Pavlodar oblysynda búginde 467 myńnas astam iri qara, 623 myń qoı-eshki, 279 myńnan astam jylqy bar. Jylqyny qospaǵanda qystaqtarǵa bir mıllıonnan asa mal kirdi.</p>

Óńirdegi fermerler men jeke turǵyndardyń qystaqtarynda 456 myń qara mal, 623 myń qoı men eshki bar.

- Bıyl jazda jem-shóp daıyndalǵan shabyndyqtar aýmaǵy 281 myń gektardy qurap, ótken jylǵydan 19 myń gektarǵa artyq boldy. Nátıjesinde fermerlerimiz bir jarym jylǵa jetetin mal azyǵyn qamdap aldy dese bolady. Shamamen 1 mln 835,6 myń tonna shóp shabylyp, jospar artyǵymen oryndaldy. Buǵan qosa 112,3 myń tonna pishendeme, 182 myń tonna súrlem, 317 myń tonna saban daıyndaldy. Shabyndyqtarda maıalanǵan shóptiń 91 paıyzy qystaqtarǵa jetkizildi,-dep habarlady Kazinform tilshisine Pavlodar oblysy aýyl sharýashylyǵy basqarmasy basshysynyń orynbasary Tólegen Kósherbaev.

Aımaqtaǵy iri qara maldyń 17,6 paıyzy asyl tuqymdy. Asyl tuqymdy sıyrlardy ósirýmen 168-den astam sharýashylyq aınalysady. Et baǵytynda - qazaqtyń aqbas sıyry, gereford, aberdın-angýs, áýlıekól tuqymdary, sút baǵytynda sımmental, golshtın, qyzyl dala túrleri ósirilip otyr. Al usaq maldardyń 3,9 paıyzy, jylqynyń nebári 2,4 paıyzy ǵana asyl túlik bolyp sanalady.

Statıstıkalyq derekter aımaqtaǵy iri qaranyń azaıǵanyn kórsetip otyr. 2022 jyly óńirde 527,8 myń túlik sanalsa, qazirgi ýaqytta olardyń sany 467 myńnan sál asady. Al jylqy sońǵy eki jylda 58 myńǵa ósken. Oblysta túıemen aınalysatyn sharýashylyqtar da kóbeıe túsken. 2022 jyly aımaqta Zeńgi baba tuqymynyń 32 túligi tirkelse, búginde olardyń sany 150-ge jýyqtap qalǵan.

Eske sala keteıik, Pavlodarda Ertis ózeniniń deńgeıi kóterilip, sharýalar jaıylmadaǵy shópterin jetkize almaı otyr.